The Bads of Bollywood: સમીર વાનખેડે કેસમાં શાહરૂખ ખાનના રેડ ચિલીઝ એન્ટરટેઈનમેન્ટને દિલ્હી હાઈકોર્ટે સમન્સ પાઠવ્યા, સાત દિવસમાં જવાબ આપવો પડશે; આર્યન ખાનની વૅબ સિરીઝ દિલ્હી `ધ બેડ્સ ઓફ બોલિવૂડ` સાથે જોડાયેલો છે મામલો
સમીર વાનખેડેની અરજી બાદ દિલ્હી હાઈકોર્ટે શાહરુખ ખાન પાસેથી માંગ્યો છે સાત દિવસમાં જવાબ
શાહરુખ ખાન (Shah Rukh Khan) અને તેનો દીકરો આર્યન ખાન (Aryan Khan) ફરી એકવાર પૂર્વ એનસીબી (NCB) અધિકારી સમીર વાનખેડે (Sameer Wankhede)ની રડારમાં આવ્યા છે. દિલ્હી હાઈકોર્ટ (Delhi High Court) એ બુધવારે રેડ ચિલીઝ એન્ટરટેઈનમેન્ટ (Red Chillies Entertainment) અને નેટફ્લિક્સ (Netflix) ને ભારતીય મહેસૂલ સેવા (Indian Revenue Service - IRS) ના અધિકારી સમીર વાનખેડે દ્વારા તેમની વેબ સિરીઝ `ધ બેડ્સ ઓફ બોલિવૂડ` (The Bads of Bollywood) માં તેમની પ્રતિષ્ઠાને કથિત રીતે ખરાબ કરવા બદલ દાખલ કરાયેલા દાવા અંગે સમન્સ જારી કર્યા છે.
દિલ્હી હાઈકોર્ટે બુધવાર – ૮ ઓક્ટોબરના રોજ ભૂતપૂર્વ NCB અધિકારી સમીર વાનખેડે દ્વારા શાહરૂખ ખાનના પ્રોડક્શન હાઉસ રેડ ચિલીઝ એન્ટરટેઈનમેન્ટ અને નેટફ્લિક્સ સામે આર્યન ખાન દિગ્દર્શિત વેબ સિરીઝ `ધ બેડ્સ ઓફ બોલિવૂડ`માં સમિર વાનખેડેના પાત્રને લઈને દાખલ કરાયેલા માનહાનિના કેસમાં સમન્સ જારી કર્યા. દિલ્હી હાઈકોર્ટે રેડ ચિલીઝ, નેટફ્લિક્સ, એક્સ (X), ગૂગલ (Google), મેટા (Meta) અને અન્ય કંપનીઓને સાત દિવસમાં તેમના જવાબો દાખલ કરવા જણાવ્યું છે. આગામી સુનાવણી 30 ઓક્ટોબરે યોજાશે.
ADVERTISEMENT
ન્યાયાધીશ પુરુષેન્દ્ર કુમાર કૌરવે વચગાળાની રાહત માટેની અરજી પર નોટિસ જારી કરી અને 30 ઓક્ટોબરના રોજ વધુ વિચારણા માટે આ બાબતની યાદી આપી.
સમીર વાનખેડે તરફથી હાજર રહેતા વરિષ્ઠ વકીલ સંદીપ સેઠીએ કહ્યું, ‘આ શ્રેણીને કારણે, લોકો મારા, મારી પત્ની અને મારી બહેન વિશે ટ્રોલ પોસ્ટ કરી રહ્યા છે. આ પોસ્ટ્સ સ્પષ્ટપણે બદનક્ષીભરી અને ખૂબ જ આઘાતજનક છે.’
આ પછી, કોર્ટે સમન્સ જારી કરીને કહ્યું, ‘અમે પ્રશંસા કરીએ છીએ કે આ કોર્ટમાં જવા માટે તમારા પક્ષમાં કારણ છે, પરંતુ એક પ્રક્રિયાનું પાલન કરવું પડશે.’
સમીર વાનખેડેએ રુપિયા ૨ કરોડના નુકસાનની માંગણી કરી છે, જે તેઓ ટાટા મેમોરિયલ કેન્સર હોસ્પિટલ (Tata Memorial Cancer Hospital) ને દાન કરવાનો ઇરાદો ધરાવે છે. તેમની અરજીમાં જણાવાયું છે કે, આ શ્રેણી ડ્રગ વિરોધી એજન્સીઓને નકારાત્મક રીતે રજૂ કરે છે. તેના કારણે કાયદામાં લોકોનો વિશ્વાસ ઓછો થાય છે.
અરજીમાં સમીર વાનખેડે દ્વારા એવો પણ આરોપ મૂકવામાં આવ્યો છે કે, આ વૅબ સિરિઝ જાણી જોઈને વાનખેડેની છબી ખરાબ કરવા માટે બનાવવામાં આવી હતી, ખાસ કરીને જ્યારે શાહરૂખ ખાનના પુત્ર આર્યન ખાન સાથે જોડાયેલો કેસ કોર્ટમાં પેન્ડિંગ છે. કોર્ટે હજી સુધી વચગાળાનો આદેશ જારી કર્યો નથી અને કેટલીક વેબસાઇટ્સ પરથી કથિત રીતે વાંધાજનક કનટેન્ટ દૂર કરવાની વાનખેડેની વિનંતીનો જવાબ પણ માંગ્યો છે.
દિલ્હી હાઈકોર્ટે અગાઉ વાનખેડેને રેડ ચિલીઝ એન્ટરટેઈનમેન્ટ અને નેટફ્લિક્સ સામેની તેમની માનહાનિની અરજીની જાળવણી અંગે પ્રશ્ન ઉઠાવ્યો હતો.
તમને જણાવી દઈએ કે, સમીર વાનખેડે એક IRS અધિકારી અને નાર્કોટિક્સ કંટ્રોલ બ્યુરો (NCB) મુંબઈના ભૂતપૂર્વ ઝોનલ ડિરેક્ટર છે. તેણે હાઇ-પ્રોફાઇલ એન્ટી નાર્કોટિક્સ તપાસનું નેતૃત્વ કર્યું છે, જેમાં શાહરૂખ ખાનના પુત્ર આર્યન ખાનના ક્રૂઝ કેસનો પણ સમાવેશ થાય છે.
