તેણે ૧૪ ઑગસ્ટે પોતાના ફ્રેન્ડ કરણ બુલાની સાથે લગ્ન કરી લીધાં છે
રિયા કપૂર પતિ કરણ બુલાની દબસાથે
કરવા ચૌથનું વ્રત રાખવાની સલાહ આપનાર લોકોનો રિયા કપૂરે ક્લાસ લીધો છે. તેણે ૧૪ ઑગસ્ટે પોતાના ફ્રેન્ડ કરણ બુલાની સાથે લગ્ન કરી લીધાં છે. આ વખતે તેની પહેલી કરવા ચૌથ છે. જોકે તે આવા વ્રતમાં વિશ્વાસ નથી રાખતી. એ વિશે ઇન્સ્ટાસ્ટોરી પર એક નોટ શૅર કરીને રિયાએ લખ્યું હતું, ‘સૌને સન્માનપૂર્વક જણાવવા માગું છું કે કરવા ચૌથની ગિફ્ટ આપવા કે અને મળવા મારી પાસે ન આવતા. કરણ અને હું આ વસ્તુમાં ભરોસો નથી રાખતાં. જોકે અન્ય દંપતીઓ જેને એમાં રસ હોય અને તેઓ આવું પર્વ મનાવતાં હોય તેમના પ્રત્યે અમને સન્માન છે. આ વ્રત અમારા બન્ને માટે નથી. એથી હું કોઈ એવી વસ્તુને પ્રમોટ નથી કરતી જેમાં મને ભરોસો ન હોય. સાથે જ એના ઉદ્દેશ પર પણ મને વિશ્વાસ નથી. મને લાગે છે કે જો આપણે આપણી જાતનું અને એકમેકની કાળજી લઈએ તો સારી વાત છે. આ બધું હું એટલા માટે લખું છું, કેમ કે કેટલાક અજાણ્યા લોકો મને સમજાવી રહ્યા છે કે હું પાગલપન કરી રહી છું. તેમના કહેવા મુજબ મારે આ વ્રત કરવું જોઈએ, કેમ કે આ મારું પહેલું વ્રત છે. ના, આભાર. આગળ વધો. જો તમે આ વાંચી રહ્યા હો તો આ બકવાસ જાણવા બદલ થૅન્ક યુ.’