ફ્રાન્સમાં ૧૩ વર્ષ સુધીનાં બાળકોને સ્માર્ટ ફોનથી દૂર રાખવાની સરકારની તૈયારી

૧૮ વર્ષની ઉંમર સુધી સોશ્યલ મીડિયાના ઉપયોગ પર પણ બૅન મૂકવાની ભલામણ કરવામાં આવી છે.

પ્રતીકાત્મક તસવીર

બાળકો બોલવાનું શીખે એ પહેલાં મોબાઇલ ફોનની લત લાગી જતી હોય છે ત્યારે આ સમસ્યાનો ઉકેલ લાવવા માટે ફ્રાન્સની સરકારે તૈયારી કરી છે. ફ્રાન્સના પ્રમુખ ઇમૅન્યુઅલ મૅક્રૉનના વડપણ હેઠળની સમિતિએ ૧૩ વર્ષ સુધીનાં બાળકો સ્માર્ટ ફોન યુઝ કરી શકે નહીં એવો કાયદો લાવવાની ભલામણ કરી છે એટલું જ નહીં, ૧૮ વર્ષની ઉંમર સુધી સોશ્યલ મીડિયાના ઉપયોગ પર પણ બૅન મૂકવાની ભલામણ કરવામાં આવી છે. સમિતિએ ત્રણ મહિના સુધી અભ્યાસ કર્યા બાદ આ ભલામણો કરી છે. 

બાળકોમાં મોબાઇલ ફોનની લત વિશે ફ્રાન્સ સરકારની સમિતિનું શું માનવું છે? 

સમિતિનું માનવું છે કે ત્રણ વર્ષની ઉંમર સુધીનાં બાળકોને મોબાઇલ કે ટીવી સહિત કોઈ પણ પ્રકારના સ્ક્રીનના સંપર્કથી દૂર રાખવાં જોઈએ. 
જો ૧૧થી ૧૩ વર્ષની વયનાં બાળકોને ફોન આપવાની જરૂર પડે તો આ ફોનમાં ઇન્ટરનેટ કનેક્શન ન હોય એ જરૂરી છે. 
૧૩ વર્ષની વય પછી જ ઇન્ટરનેટ હોય એવો ફોન આપવો જોઈએ. 
૩થી ૬ વર્ષની વય સુધીનાં બાળકોનો સ્ક્રીન-ટાઇમ મર્યાદિત રહે એ પણ જરૂરી છે.