ચીનનાં જાહેર શૌચાલયોમાં ટૉઇલેટ પેપર તો જ મળશે જો તમે ઍડ્વર્ટાઇઝમેન્ટ જુઓ

ટિશ્યુ પેપરનો વેસ્ટ અટકાવવા માટે ચીનનાં જાહેર શૌચાલયોમાં ટૉઇલેટ પેપર તો જ મળશે જો તમે ઍડ્વર્ટાઇઝમેન્ટ જુઓ

અજીબોગરીબ સિસ્ટમ

ચીનના પબ્લિક ટૉઇલેટમાં એક અજીબોગરીબ સિસ્ટમ ફિટ કરેલી જોવા મળી રહી છે. જ્યારે ફ્રીમાં ટૉઇલેટ પેપર મળતા હોય તો એનો બગાડ બહુ થાય છે. આ વાતને ધ્યાનમાં લઈને ચીનનાં જાહેર શૌચાલયોમાં જાતજાતના અખતરાઓ થતા આવ્યા છે. ૨૦૧૭માં ટૉઇલેટ પેપર ડિસ્પેન્સરમાં ફેસ-સ્કૅનર ગોઠવવામાં આવેલાં અને એક વાર સ્કૅન કર્યા પછી માત્ર ૬૦ સેન્ટિમીટરની જ ટિશ્યુ સ્ટ્રિપ નીકળતી હતી. જો તે વ્યક્તિએ વધુ સ્ટ્રિપ લેવી હોય તો ૯ મિનિટ પછી જ મળતી. જોકે આ સિસ્ટમનો લોકોએ દુરુપયોગ કરવાનું શરૂ કરી દીધું. લોકો જરૂર હોય કે ન હોય, ટૂરિસ્ટ-સ્પૉટ પરનાં જાહેર શૌચાલયોમાં ચહેરો સ્કૅન કરાવી ટિશ્યુ કાઢીને પોતાની સાથે કૅરી કરવા લાગ્યા. એ પછી ૨૦૧૯માં વ્યક્તિદીઠ દર ૧૦ મિનિટે જ એક ટૉઇલેટ-સ્ટ્રિપ નીકળે એવી ટેક્નૉલૉજી લાવવામાં આવી. જોકે હવે આ સમસ્યામાં નવો ટ્વિસ્ટ ઉમેરાયો છે. હવે જાહેર શૌચાલયમાં ટૉઇલેટ પેપર ડિસ્પેન્સર પાસે એક QR કોડ લગાવવામાં આવ્યો છે. આ કોડ સ્કૅન કરો એટલે એક ઍડ્વર્ટાઇઝમેન્ટ જોવા મળે. એ પૂરી થાય એટલે જ ડિસ્પેન્સરમાંથી નાની ટિશ્યુની સ્ટ્રિપ નીકળે. આ નવી સિસ્ટમમાં બે ઑપ્શન છે. એક, જો તમે કોડ સ્કૅન કરીને થોડીક સેકન્ડ્સની ઍડ જોઈ લો તો ફ્રીમાં ટિશ્યુ પેપર મળશે અને જો ન જોવા માગતા હો તો ૦.૫ યુઆન એટલે કે લગભગ ૬.૫ રૂપિયા ચૂકવીને ટિશ્યુપેપર મેળવી લો. એનાથી ટૉઇલેટ ચલાવતી કંપની હવે ઍડ દેખાડવાના પૈસા પણ કમાઈ શકશે. જોકે સવાલ એ છે કે જો કોઈ વ્યક્તિ મોબાઇલ વિના જાહેર શૌચાલયમાં જાય તો શું?