આ ઈંડું એક ઉકરડામાં માનવીના સુકાઈ ગયેલા મળની અંદર સાચવી રાખવામાં આવ્યું હતું
મરઘીનું ઈંડું
ઇઝરાયલના પુરાતત્ત્વવિદોને મરઘીનું એવું ઈંડું મળ્યું છે જે તેમના અંદાજ પ્રમાણે ૧૦૦૦ વર્ષ જૂનું છે. આ ઈંડું એક ઉકરડામાં માનવીના સુકાઈ ગયેલા મળની અંદર સાચવી રાખવામાં આવ્યું હતું. સંશોધકોને આ એગ મળ્યું ત્યારે એ સાવ સામાન્ય લાગતું હતું અને એના પર એક નાની તિરાડ હતી. એના પરથી તેમનું માનવું છે કે ઈંડામાંનાં સફેદ તત્ત્વો કદાચ લીક થયાં હશે. એ સિવાય, આખું ઈંડું અકબંધ હતું.
આ શોધ ઇઝરાયલ ઍન્ટિક્વિટીઝ ઑથોરિટી યાવ્ને નામના વિસ્તારમાં વિકાસનાં કાર્યો શરૂ કરતાં પહેલાંની સાફસૂફી કરી રહ્યા હતા ત્યારે એક જગ્યાએથી તેમને આ ઈંડું મળ્યું હતું જે ૧૦૦૦ વર્ષ પહેલાંના ઇસ્લામી યુગ સમયનું હોવાનું મનાય છે. સંશોધકોને ખોદકામ દરમ્યાન જે ઉકરડા જેવો ભાગ મળ્યો એ પણ આટલાં જ વર્ષ જૂનો હોવાની ધારણા છે. માત્ર શાહમૃગનાં જ અમુક ઈંડાં સદીઓ સુધી રહી શકે, કારણકે એનું કવચ સૌથી જાડું હોય છે. જોકે મરઘીનું આટલાં વર્ષો જૂનું હોવાનું જણાતાં સંશોધકો-વિજ્ઞાનીઓ માટે એ ચર્ચાનો વિષય બની ગયો છે.
