ગુજરાત સરકારે વડોદરામાં સંસદસભ્ય યુસુફ પઠાણને લાંબા સમયથી વિવાદમાં રહેલો ૯૭૮ ચોરસમીટરનો પ્લૉટ ફાળવવાની મંજૂરી આપી છે. આ પ્લૉટની માર્કેટવૅલ્યુ અંદાજે ૨૦.૫૩ કરોડ રૂપિયા હોવાનો અંદાજ છે.
યુસુફ પઠાણ
ગુજરાત સરકારે વડોદરામાં સંસદસભ્ય યુસુફ પઠાણને લાંબા સમયથી વિવાદમાં રહેલો ૯૭૮ ચોરસમીટરનો પ્લૉટ ફાળવવાની મંજૂરી આપી છે. આ પ્લૉટની માર્કેટવૅલ્યુ અંદાજે ૨૦.૫૩ કરોડ રૂપિયા હોવાનો અંદાજ છે. આમાં ૫૦૦ ચોરસમીટર જમીનને રેસિડેન્શિયલ વપરાશ માટે ગિફ્ટ આપવામાં આવશે, જે મફત હશે. એની કિંમત ૧૦.૫૦ કરોડ રૂપિયા છે. બાકીના ૪૭૮ ચોરસ મીટર માટે પ્લૉટની કિંમતના પંચાવન ટકા અથવા આશરે ૫.૫૨ કરોડ રૂપિયાની ચુકવણી કરવાની જરૂર પડશે. એમાં માર્કેટવૅલ્યુના ૪૫ ટકા કન્સેશન આપવામાં આવશે.
ગુજરાત સરકાર અને યુસુફ પઠાણ વચ્ચે આ જમીન બાબતે છેલ્લાં ૧૪ વર્ષથી વિવાદ ચાલી રહ્યો છે. વડોદરા સુધરાઈના કમિશનર અરુણ મહેશ બાબુએ જણાવ્યું હતું કે આ દરખાસ્તને કૉર્પોરેશનની સ્થાયી સમિતિ સમક્ષ મૂકવામાં આવશે.
પશ્ચિમ બંગાળ વિધાનસભાની ચૂંટણીમાં મમતા બૅનરજીના પરાજય બાદ યુસુફ પઠાણ ૧૪ જૂને તૃણમૂલ કૉન્ગ્રેસ છોડીને નૅશનલિસ્ટ સિટિઝન્સ પાર્ટી ઑફ ઇન્ડિયા (NCPI)માં જોડાયો હતો. તેની સાથે ૧૯ અન્ય સંસદસભ્યોએ પણ પાર્ટી છોડી દીધી હતી. એના લગભગ બે મહિના બાદ ઑગસ્ટમાં સુધરાઈને આ પ્લૉટ સંદર્ભમાં મંજૂરી મળી હતી. આ પહેલાં યુસુફ પઠાણે ગુજરાત સરકાર વિરુદ્ધ કરેલી અપીલ પાછી ખેંચી લીધી હતી.
કેટલો જૂનો છે આ વિવાદ?
આ વિવાદ ૨૦૧૨નો છે. એ સમયે યુસુફ પઠાણે તેના ઘરની બાજુનો પ્લૉટ સિક્યૉરિટી કારણોસર ૯૯ વર્ષની લીઝ માટે માગ્યો હતો. વડોદરા સુધરાઈએ પબ્લિક ઑક્શન વિના આ પ્લૉટ ફાળવવાની મંજૂરી આપી હતી, પણ શહેરી વિકાસ વિભાગે આ દરખાસ્તને ફગાવી દીધી હતી. વડોદરા સુધરાઈનો દાવો છે કે દરખાસ્ત ફગાવી દેવામાં આવવા છતાં પઠાણે પ્લૉટ પર કબજો કર્યો હતો. ૨૦૨૪ના જૂનમાં યુસુફ પઠાણે પશ્ચિમ બંગાળમાં લોકસભાની ચૂંટણી જીતી લીધા બાદ વડોદરા સુધરાઈએ તેને પ્લૉટ પરનું અતિક્રમણ હટાવવા નોટિસ આપી હતી. આના વિરોધમાં યુસુફ પઠાણે હાઈ કોર્ટમાં અરજી કરી હતી.
