SITએ દરવાજો તોડવાની ધમકી આપી એ પછી તેઓ બહાર આવ્યા
ગઈ કાલે જનતા દલ (સેક્યુલર)ના નેતા એચ. ડી. રેવન્નાની ધરપકડ કરીને કસ્ટડીમાં લઈ જતી સ્પેશ્યલ ઇન્વેસ્ટિગેશન ટીમ.
કર્ણાટકના સૌથી મોટા સેક્સ-સ્કૅન્ડલના મુખ્ય આરોપી સંસદસભ્ય પ્રજ્વલ અને તેના ધારાસભ્ય પિતા એચ. ડી. રેવન્નાની મુશ્કેલીઓ હવે વધશે. શનિવારે સ્પેશ્યલ ઇન્વેસ્ટિગેશન ટીમ (SIT)એ રેવન્નાની ધરપકડ કરી હતી. રેવન્ના વિરુદ્ધ સેક્સ-સ્કૅન્ડલની એક મહિલાનું અપહરણ કરવાનો આરોપ છે. રેવન્ના તેમના પિતા અને ભૂતપૂર્વ વડા પ્રધાન એચ.ડી. દેવ ગૌડાના બૅન્ગલોરમાં આવેલા ઘરમાં છુપાયેલા હતા. ધરપકડ દરમ્યાન ભારે ડ્રામા થયાં હતાં. ઘરની બહાર આવવા માટે અધિકારીઓએ વારંવાર જણાવ્યું હોવા છતાં રેવન્ના બહાર આવતા નહોતા. છેવટે દરવાજો તોડવાની ધમકી આપવામાં આવ્યા બાદ તેઓ બહાર આવ્યા એ પછી તેમની અરેસ્ટ થઈ હતી.
પ્રજ્વલ સામે બ્લુ-કૉર્નર નોટિસ જાહેર થશે
સેક્સ-સ્કૅન્ડલનો માસ્ટરમાઇન્ડ પ્રજ્વલ અત્યારે જર્મનીમાં છે. પ્રજ્વલ વિરુદ્ધ બ્લુ-કૉર્નર નોટિસ જારી કરવા માટે શનિવારે કર્ણાટક સરકારે સેન્ટ્રલ બ્યુરો ઑફ ઇન્વેસ્ટિગેશન (CBI)ને ભલામણ કરી હતી. બ્લુ-કૉર્નર નોટિસને કારણે જર્મનીની સુરક્ષા-એજન્સીઓ પ્રજ્વલ ક્યાં છુપાયો છે એની જાણકારી ભારત સાથે શૅર કરશે.
