પ્રાઇમ ફોકસ સ્ટુડિયોની પાછળનું ટેમ્પરરી સ્ટ્રક્ચર આગમાં બળીને ખાખ
ગોરેગામ ફિલ્મસિટીના ટેમ્પરરી સેટ પર ગઈ કાલે લાગેલી ભીષણ આગ.
ગોરેગામ ફિલ્મસિટીના પ્રાઇમ ફોકસ સ્ટુડિયોની પાછળ એક કાચા સ્ટ્રક્ચરમાં ગઈ કાલે સાંજે ૪ વાગ્યે આગ ફાટી નીકળી હતી. આ ઘટનાની જાણ ફાયર-બ્રિગેડને કરવામાં આવતાં ફાયર-એન્જિન ધસી ગયાં હતાં. એક કલાકની ભારે જહેમત બાદ આગ ઓલવી શકાઈ હતી.
આ આગ ‘પતિ, પત્ની ઔર પંગા-સીઝન 2’ના સેટ પરના ૧૦૦ X ૨૦ના કન્ટ્રોલ-રૂમમાં લાગી હતી. એ સમયે જોકે ત્યાં કોઈ શૂટિંગ ચાલી રહ્યું નહોતું એટલે જાનહાનિ થઈ નહોતી. એ પછી બાજુમાં ‘હસલ-સીઝન 5’ની ગ્રૅન્ડ ફિનાલેનું શૂટિંગ ચાલી રહ્યું હતું ત્યાં પણ એ પ્રસરી હતી. ત્યાં બધા કલાકારો હાજર હતા, પરંતુ બધા સુરક્ષિત હતા અને કોઈ જાનહાનિ થઈ નહોતી. આગમાં ઇલેક્ટ્રિક વાયરિંગ, ઇલેક્ટ્રિક ઇન્સ્ટૉલેશન, કેબલ, દરવાજા, લાકડાનાં પાટિયાં, ઍર-કન્ડિશન યુનિટ, બામ્બુ, પ્લાસ્ટિકનું મટીરિયલ, સાઉન્ડ-સિસ્ટમ અને શૂટિંગ-મટીરિયલ બળીને ખાખ થઈ ગયું હતું. આગ ચોક્કસ કયાં કારણોસર લાગી એ જાણી શકાયું નહોતું.
