પોલીસે જણાવ્યા મુજબ આરોપી અને તેની પત્ની સાઉથ મુંબઈમાં ફરવા આવ્યાં હતાં. એ દરમ્યાન બન્ને વચ્ચે કોઈ બાબતે બોલાચાલી થઈ હતી
કોયતો દેખાડતો આરોપી વકાર શેખ અને તેને પકડતી પોલીસ.
શનિવારે સાંજે ૬.૪૫ વાગ્યે એક માણસ છત્રપતિ શિવાજી મહારાજ ટર્મિનસ (CSMT)ની બહાર રસ્તામાં એક મહિલાને કોયતાથી ધમકાવતો દેખાતાં લોકોએ આ બાબતની પોલીસને જાણ કરી હતી. પોલીસે ઘટનાસ્થળે જઈને તેને પકડ્યો હતો. જોકે પૂછપરછ કરતાં તે માણસ જે મહિલાને ધમકાવતો હતો તેણે તે તેનો પતિ હોવાની માહિતી આપી હતી. પોલીસે ઘટનાસ્થળે જઈને મહિલા તથા બીજા લોકોને ધમકાવતા માણસને પકડી પાડ્યો હતો અને તેની પાસેથી કોયતો છીનવીને તેને તાબામાં લીધો હતો. જોકે પછી મહિલાએ જ પોલીસને તે માણસ તેનો પતિ હોવાનું જણાવ્યું હતું. આરોપીનું નામ વકાર શેખ હોવાનું પોલીસે જણાવ્યું હતું.
માતા રમાબાઈ આંબેડકર (MRA) માર્ગ પોલીસને લોકોની ફરિયાદ મળી હતી કે એક માણસ તેની સાથે રહેલી મહિલાને અને ત્યાંથી પસાર થતા લોકોને કોયતો ઉગામીને ધમકાવી રહ્યો છે. પોલીસ તરત જ ઘટનાસ્થળે પહોંચી હતી અને તેમણે કરેલી ઝડપી કાર્યવાહીને કારણે આ ઘટનામાં કોઈને ઈજા થઈ નહોતી.
ADVERTISEMENT
પોલીસે જણાવ્યા મુજબ આરોપી અને તેની પત્ની સાઉથ મુંબઈમાં ફરવા આવ્યાં હતાં. એ દરમ્યાન બન્ને વચ્ચે કોઈ બાબતે બોલાચાલી થઈ હતી એટલે આરોપી વકાર શેખે કોયતો કાઢીને મહિલાને ધમકાવવાનું શરૂ કર્યું હતું. તેને અટકાવવાનો પ્રયાસ કરનારા લોકોને પણ વકાર શેખે કોયતો દેખાડીને ધમકાવ્યા હતા. વકાર શેખ વિરુદ્ધ આર્મ્સ ઍક્ટ અને અન્ય કલમો હેઠળ ગુનો નોંધીને તેની ધરપકડ કરવામાં આવી હતી.
