પોતાની સાથે એક બૅગ પણ લઈ જતી જોવા મળી હતી. આ કેસમાં પોલીસે અત્યાર સુધીમાં ૫૦ ટકા માલમતા રિકવર કરી લીધી છે.
પ્રતીકાત્મક તસવીર
માટુંગા-ઈસ્ટની રામબાગ લેનમાં આવેલી એક સોસાયટીમાં રહેતી ૨૯ વર્ષની ગુજરાતી મહિલાના ઘરમાંથી ૭ લાખ રૂપિયાની માલમતાની ચોરી કરવાના આરોપસર માટુંગા પોલીસે ૩૪ વર્ષની હાઉસહેલ્પ તેજલ શિંદેની ધરપકડ કરી છે. ગુજરાતી પરિવાર ગયા મહિને વિદેશ ગયો હતો ત્યારે તમામ નોકરોને રજા આપવામાં આવી હતી. એ દરમ્યાન પરિવારજનો જ્યારે તાજેતરમાં ઘરે પાછા ફર્યા ત્યારે બેડરૂમના કબાટમાંથી દાગીના ચોરાઈ ગયા હોવાની ખાતરી થઈ હતી. વધુ તપાસ માટે ઘરમાં લાગેલા CCTV કૅમેરા તપાસવામાં આવ્યા ત્યારે પરિવાર વિદેશ હતો છતાં નોકરાણી ઘરે આવતી દેખાઈ હતી એટલું જ નહીં, પોતાની સાથે એક બૅગ પણ લઈ જતી જોવા મળી હતી. આ કેસમાં પોલીસે અત્યાર સુધીમાં ૫૦ ટકા માલમતા રિકવર કરી લીધી છે.
માટુંગા પોલીસ-સ્ટેશનના સિનિયર ઇન્સ્પેક્ટર દાદાસાહેબ ઘુટુકડેએ ‘મિડ-ડે’ને કહ્યું હતું કે ‘ફરિયાદી પરિવાર ૧૦ મેથી ૪ જૂન દરમ્યાન વિદેશમાં હતો અને જ્યારે પરિવારના સભ્યો ઘરે પાછા આવ્યા ત્યારે તેમણે કબાટનું લૉકર ચેક કરતાં એમાંના દાગીના ગાયબ હતા. તે વખતે હાઉસહેલ્પ તેજલને ફોન કર્યા છતાં તેણે કામ પર આવવાનું બંધ કરી દીધું હતું અને તેના સસરા બીમાર હોવાનું બહાનું બતાવીને સુરત હોવાનું કહીને ઉડાઉ જવાબ આપ્યા હતા. પરિવારને શંકા જતાં જ્યારે ઘરમાં લગાવેલા CCTV કૅમેરાનાં ફુટેજ તપાસ્યાં ત્યારે ૯ મેએ તેજલ શંકાસ્પદ હિલચાલ કરતી કૅમેરામાં કેદ થઈ હતી. એના આધારે ફરિયાદી પરિવારે હાઇઉસહેલ્પ વિરુદ્ધ ફરિયાદ નોંધાવી હતી. એ પછી આરોપી હાઉસહેલ્પ તેજલ શિંદેની ધરપકડ કરવામાં આવી છે. તેની કડક પૂછપરછ કરીને ચોરાયેલા મુદ્દામાલમાંથી આશરે ૫૦ ટકા જેટલા દાગીના રિકવર કરી લીધા છે. પ્રાથમિક તપાસમાં જાણવા મળ્યું હતું કે મહિલાએ ચોરેલા અમુક દાગીના વેચી દીધા છે. હાલમાં આ મામલે વેચેલા સોનાનાં ઘરેણાં પાછાં મેળવવા માટે આગળની તપાસ ચલાવી રહ્યા છીએ.’
