શિવાજી પાર્કમાં વિરોધ-પ્રદર્શન માટે પરવાનગી ન મળી તો અભિજિત દીપકેએ નવો રસ્તો અપનાવ્યો
અભિજિત દીપકે
મુખ્ય ચૂંટણી કમિશનર જ્ઞાનેશ કુમાર વિરુદ્ધ શિવાજી પાર્કમાં પ્રસ્તાવિત વિરોધ-પ્રદર્શન માટે મુંબઈ પોલીસે પરવાનગી નકાર્યા બાદ કૉક્રૉચ જનતા પાર્ટી (CJP)ના સ્થાપક અભિજિત દીપકેએ બીજી ઑક્ટોબરે મુંબઈમાં જેલભરો આંદોલનની જાહેરાત કરી હતી. અભિજિત દીપકેએ સોમવારે સોશ્યલ મીડિયા પોસ્ટ દ્વારા આ પગલાની જાહેરાત કરતાં લખ્યું હતું કે ‘મુંબઈમાં જેલભરો આંદોલન. બીજી ઑક્ટોબર, શિવાજી પાર્ક. #SaveDemocracy (લોકશાહી બચાઓ).’ તેમણે કહ્યું કે પરવાનગી નકારવાનો પોલીસનો નિર્ણય અસ્વીકાર્ય છે અને આક્ષેપ કર્યો કે આ નાગરિકોના અવાજને દબાવવાનો પ્રયાસ છે. CJP મુખ્ય ચૂંટણી કમિશનર જ્ઞાનેશ કુમારના રાજીનામાની માગણી કરી રહી છે અને સ્પેશ્યલ ઇન્ટેન્સિવ રિવિઝન (SIR) પ્રક્રિયા સામે વાંધો ઉઠાવ્યો છે. આ જૂથે ચૂંટણીપંચને સંચાલિત કરતા કાનૂની માળખામાં ફેરફાર કરવાની પણ માગણી કરી છે.
પોલીસના જણાવ્યા અનુસાર CJPએ બીજી ઑક્ટોબરે બપોરે ૩થી રાત્રે ૯ વાગ્યા સુધી દાદરના શિવાજી પાર્ક ખાતે વિરોધ-પ્રદર્શન કરવાની પરવાનગી માગી હતી. આયોજકોને મોકલેલા મેસેજીસમાં શિવાજી પાર્ક પોલીસે મેદાનના ઉપયોગ વિશેનાં નિયંત્રણોનો ઉલ્લેખ કર્યો હતો જેમાં ૨૦૧૩નો બૉમ્બે હાઈ કોર્ટનો આદેશ અને મહારાષ્ટ્ર સરકારનો ઠરાવ સામેલ છે.
