રૉયલ ફ્લોરા બિલ્ડિંગમાં વહેલી સવારે એક વૃદ્ધે બિલાડીને અચાનક જ નીચે ફેંકી દીધી
આ વ્યક્તિએ બિલાડીને ધક્કો માર્યો હતો.
અંબરનાથ-ઈસ્ટના પાલેગાવ વિસ્તારમાં આવેલા રૉયલ ફ્લોરા બિલ્ડિંગમાં રવિવારે સવારે એક વૃદ્ધે બારમા માળેથી બિલાડીને ધક્કો મારીને મારી નાખવાની ક્રૂર ઘટના બહાર આવી છે. બિલ્ડિંગમાં લગાડવામાં આવેલા CCTV કૅમેરામાં એ ઘટના ઝિલાઈ ગઈ હતી.
આ ઘટના બિલ્ડિંગની A વિંગના બારમા માળે બની હતી. રવિવારે સવારે ૫.૪૫ વાગ્યે બારમા માળે ડક્ટની દીવાલ પર એક બિલાડી ચાલી રહી હતી. આ સમયે એક પાગલ માણસ ધીમાં પગલાં સાથે ત્યાં આવે છે. તે માણસ વૃદ્ધ દેખાય છે. જેમ-જેમ પાગલ માણસ બિલાડીની નજીક જાય છે, બિલાડી ડરી જાય છે. થોડી વારમાં તે બિલાડીને ધક્કો મારીને ડક્ટમાંથી નીચે ધકેલી દે છે. વૃદ્ધના હાથમાં રૂમાલ પણ દેખાય છે. આ પછી તે બિલાડી નીચે પડી ગઈ છે કે નહીં એ જોવા માટે નીચે ઝૂકે છે. એ પછી તે ત્યાંથી ચાલ્યો જાય છે. આ આખી ઘટના રૉયલ ફ્લોરા બિલ્ડિંગના CCTV કૅમેરામાં કેદ થઈ ગઈ છે. આ ઘટના આ વિડિયોમાં સ્પષ્ટપણે દેખાય છે. આ ઘટના સવારે બની હોવાથી બિલ્ડિંગના પરિસરમાં કોઈ દેખાતું નથી.
ADVERTISEMENT
બારમા માળે આવેલા બધા રૂમના દરવાજા બંધ છે એટલે પાગલ માણસ આ ચોંકાવનારું કૃત્ય કરી શક્યો. આ ઘટનામાં બિલાડીએ જીવ ગુમાવ્યો છે. આ અંગેની માહિતી મળતાં બિલ્ડિંગના રહેવાસીઓ ગુસ્સે ભરાયા છે. આ કિસ્સામાં હવે આ વૃદ્ધ સામે પ્રાણી સંરક્ષણ કાયદા હેઠળ કેસ દાખલ કરવામાં આવી રહ્યો છે. જોકે તેણે બિલાડીને કેમ ધક્કો માર્યો? બારમા માળેથી બિલાડીને ધક્કો મારવાનું કારણ શું છે? આ માહિતી હજી સુધી પ્રકાશમાં આવી નથી.
