સ્થાનિક સુધરાઈએ જોખમી જાહેર કરેલાં કુલ ૩૮ બિલ્ડિંગમાં ભાઈંદર-ઈસ્ટનાં બાવીસ, મીરા રોડનાં ૯ અને ભાઈંદર-વેસ્ટનાં ૭ બિલ્ડિંગનો સમાવેશ થાય છે.
પ્રતીકાત્મક તસવીર
ચોમાસું નજીક છે ત્યારે દર વર્ષની જેમ મીરા-ભાઈંદર મહાનગરપાલિકાએ જોખમી ઇમારતોની યાદી જાહેર કરી છે. મીરા-ભાઈંદરમાં ૫૧૩ જૂનાં બિલ્ડિંગો આવેલાં છે, જેમાંથી ૩૮ બિલ્ડિંગ અત્યંત જોખમી અને ગમે ત્યારે તૂટી પડે એવી સ્થિતિમાં હોવાનું જણાઈ આવ્યું છે. આ બિલ્ડિંગો રહેવાલાયક નથી એટલે એ તાત્કાલિક ખાલી કરવાની નોટિસ આપવામાં આવી છે. સ્થાનિક સુધરાઈએ જોખમી જાહેર કરેલાં કુલ ૩૮ બિલ્ડિંગમાં ભાઈંદર-ઈસ્ટનાં બાવીસ, મીરા રોડનાં ૯ અને ભાઈંદર-વેસ્ટનાં ૭ બિલ્ડિંગનો સમાવેશ થાય છે.
મીરા-ભાઈંદરમાં ૫૧૩ ઇમારત જર્જરિત છે. એમાંથી ૪૨૯ ઇમારતોને ખાલી કરાવ્યા વિના રિપેરિંગ કરી શકાય એવી સ્થિતિ છે અને ૧૫ બિલ્ડિંગોમાં નાના-મોટા રિપેરિંગની જરૂર છે, જ્યારે ૩૮ ઇમારત અત્યંત જોખમી હોવાથી એ ખાલી કરાવવી જરૂરી છે. જોકે આ જોખમી ઇમારતોમાં રહેતા લોકો માટે સુધરાઈ દ્વારા કોઈ પર્યાયી વ્યવસ્થા કરવામાં નથી આવતી એટલે જીવના જોખમે પણ લોકો આવાં બિલ્ડિંગોમાં રહે છે.
