નવરાત્રિમાં વડોદરા જિલ્લાના શેરખી ગામે ગાયત્રી આશ્રમમાં રેલાયો દિવ્ય પ્રકાશઃ દીવાઓમાં પુરાઈ રહ્યું છે ૧૫૦૦ કિલો ગાયનું ઘી : ૧૨ પંડિતો રાખી રહ્યા છે ધ્યાન
૧૧૧૧ અખંડ દીવાની ઝળહળતી જ્યોત
મધ્ય ગુજરાતમાં વડોદરા જિલ્લાના શેરખી ગામે આવેલા ગાયત્રી આશ્રમમાં નવરાત્રિનો તહેવાર ભક્તિભર્યા માહોલમાં ઊજવાઈ રહ્યો છે જ્યાં ૧૦ દિવસ સુધી ૧૧૧૧ અખંડ દીવાઓની જ્યોત પ્રજ્વલિત રહેશે. આશ્રમ દ્વારા સતત ૧૧મા વર્ષે આધ્યાત્મિક અનુષ્ઠાન કરવામાં આવ્યું છે જેમાં ૧૧૧૧ અખંડ દીવાઓની જ્યોત દિવ્ય પ્રકાશ પાથરી રહી છે. અગણિત માઈભક્તો ૧૧૧૧ દીવાઓની જ્યોતનાં દર્શન કરવા આશ્રમે આવી રહ્યા છે અને દર્શન કરીને ધન્યતા અનુભવી રહ્યા છે.
૧૧૧૧ દીવાઓની જ્યોતને અખંડ રાખવા માટે પાંચ શક્તિપીઠો અને ૮ જાગૃત મંદિરો સહિત ૧૩ પવિત્ર સ્થળો પરથી જ્યોત આશ્રમમાં લાવવામાં આવી હતી અને એના દ્વારા ૧૧૧૧ દીવાઓ પ્રજ્વલિત કરવામાં આવ્યા હતા. ૧૧૧૧ દીવાઓને અખંડિત રાખવા માટે કાળજી લેવામાં આવે છે. ૧૦ દિવસ દરમ્યાન અંદાજે ૧૫૦૦ કિલો ગાયનું ઘી વાપરવામાં આવશે. દીવાઓમાં ૧૨ પંડિતો ગાયનું ઘી પૂરી રહ્યા છે અને દીવાઓનું ધ્યાન રાખી રહ્યા છે.
