પીએમસી બૅન્ક ફ્રોડ પ્રકરણ...
પ્રતીકાત્મક તસવીર
એન્ફોર્સમેન્ટ ડિરેક્ટોરેટ (ઇડી)ના અધિકારીઓએ ગઈ કાલે સવારે પાંચ જગ્યાએ રેઇડ પાડી હતી. આ રેઇડમાં બહુજન વિકાસ આઘાડીના પ્રમુખ અને ધારાસભ્ય હિતેન્દ્ર ઠાકુરના વિરાર ખાતેના કાર્યાલય સહિત વિવા ગ્રુપના કાર્યાલયમાં પણ રેઇડ પાડીને તપાસ હાથ ધરાઈ હતી. આ રેઇડ પંજાબ-મહારાષ્ટ્ર કો. ઑપરેટિવ (પીએમસી) બૅન્ક ફ્રોડ પ્રકરણે હાથ ધરાઈ હતી. સાત કાર સાથે ૩૫થી ૪૦ અધિકારીઓની ટીમ છાપો મારવાની કાર્યવાહી કરવા પહોંચ્યા હતા.
ઈડીની તપાસ વિશે માહિતી આપતાં હિતેન્દ્ર ઠાકુરે કહ્યું હતું કે ‘ઈડીએ આવીને જે તપાસ કરવી હોય એ કરી શકે છે, કોઈ વ્યવહાર વિશે કે અન્ય કોઈ માહિતી વિશે પૂછપરછ કરશે તો એની માહિતી આપવા પણ અમે તૈયાર છીએ. આવી રેઇડ થશે એવી જાણ હતી. ઈડીની તપાસમાં અમે તેમને સંપૂર્ણ સહકાર આપી રહ્યા છીએ. અમારી પાસે છુપાવવા જેવું કંઈ નથી. અમારો દરેક વ્યવહાર ચેક દ્વારા થયો છે. આ તપાસ સામાન્ય છે, એવું કંઈ મોટું નથી.’
ADVERTISEMENT
હાલમાં ઈડી દ્વારા મોટા નેતાઓને ત્યાં છાપા મારવામાં આવી રહ્યા છે, એવા સવાલ સામે તેમનો જવાબ હતો કે ઈડીની તપાસ થતાં હવે હું પણ મોટો બની જઈશ અને હવે ન્યુઝમાં પણ છવાઈ જઈશ.