બેહાલ નવરોજી લેન
ADVERTISEMENT
ઘાટકોપર-વેસ્ટની નવરોજી લેનની સંપૂર્ણ ફૂટપાથ જૂના પેવર-બ્લૉક્સથી ભરેલી છે; જેને લીધે બાળકો, મહિલાઓ અને મોટી ઉંમરના લોકો આ ફૂટપાથનો ઉપયોગ કરી શકતા નથી. તેમણે રોડ પર ચાલવું પડે છે, જેમાં તેમને જોખમ દેખાય છે. નવરોજી લેનમાં કોઈ ઇલેક્ટ્રિક કે મોબાઇલ કંપનીનું એક મહિનાથી વધુ સમયથી કેબલ નાખવાનું કામ ચાલી રહ્યું છે. આમ તો આ કામ પૂર્ણતાને આરે છે, પણ આ કંપનીના કૉન્ટ્રૅક્ટરે રોડ ખોદીને કાઢેલા પેવર-બ્લૉક્સના ખડકલા ફૂટપાથ પર કરી દીધા છે, જેને પરિણામે આ વિસ્તારના રહેવાસીઓ હવે ફૂટપાથ પર ચાલી શકતા નથી.
આ માહિતી આપતાં આ વિસ્તારની રહેવાસી માધવી શાહે મિડ-ડે LOCALને કહ્યું હતું કે ‘આ કામ પહેલા દિવસથી જ ખૂબ જ સ્લો ચાલી રહ્યું છે, જેને કારણે અવરજવર કરવામાં ખૂબ જ તકલીફ પડે છે. આવા કામોમાં કૉન્ટ્રૅક્ટર પર થોડીઘણી નિયમોની અને સમયની પાબંદી હોવી જોઈએ જેથી લોકોને ઓછામાં ઓછી તકલીફ પડે.’
