ગોલમાલ આટલી મોટી બ્રૅન્ડ બની જશે એવી આશા નહોતી : રોહિત શેટ્ટી
રોહિત શેટ્ટી(File Photo)
રોહિત શેટ્ટીનું કહેવું છે કે તેણે કદી પણ આશા નહોતી રાખી કે ‘ગોલમાલ’ આટલી મોટી બ્રૅન્ડ બની જશે. તેણે જણાવ્યું હતું કે તે આ ફિલ્મની ફ્રૅન્ચાઇઝી બનાવતો રહેશે. આ ફિલ્મ વિશે જણાવતાં રોહિતે કહ્યું હતું કે ‘મેં જ્યારે ‘ગોલમાલ’ની શરૂઆત કરી ત્યારે મેં સપનેય વિચાર્યું નહોતું કે આ આટલી મોટી બ્રૅન્ડ બની જશે. મારા માટે તો એ એક માત્ર કૉમેડી ફિલ્મ હતી.’
૨૦૦૬માં આવેલી ‘ગોલમાલ : ફન અનલિમિટેડ’માં અજય દેવગન, અર્શદ વારસી, શર્મન જોશી, તુષાર કપૂર અને પરેશ રાવલ જોવા મળ્યા હતા. આ ફિલ્મને મળેલા પ્રતિસાદ પર ખુશી વ્યક્ત કરતાં રોહિતે કહ્યું હતું કે ‘આ ફિલ્મને જે પ્રકારે રિસ્પૉન્સ અને લોકોનો પ્રેમ મળ્યો હતો એનાથી અમને ભરપૂર કૉન્ફિડન્સ આવ્યો હતો. એ સમય એવો હતો જ્યારે ફિલ્મોની સીક્વલ બનતી હતી અને અમે ૨૦૦૮માં ‘ગોલમાલ રિટર્ન્સ’ અને ૨૦૧૦માં ‘ગોલમાલ 3’ બનાવી હતી. આ બધી ફિલ્મોને સારો રિસ્પૉન્સ મળ્યો હતો. હું એમ કહી શકું છું કે ધીમે-ધીમે આ એક બ્રૅન્ડ બની ગઈ. એના માટે કોઈ પ્લાન નહોતો કર્યો એ એમ જ બની ગઈ. હું જ્યારે એમ કહું કે ફિલ્મ સારી ચાલી એટલે કે બૉક્સ-ઑફિસ પર નહીં તે સૅટેલાઇટ પર સારી ચાલી હતી. આજે દરેક જણ ટીવીના કારણે ‘ગોલમાલ’ વિશે જાણે છે.’
