‘વો રહનેવાલી મહલોં કી’, ‘રંજુ કી બેટિયાં’ ફેમ રીના કપૂર કોરોના પહેલાં શૂટ થતી વેડિંગ સીક્વન્સને મિસ કરી રહી છે
રીના કપૂર
દંગલ ચૅનલના શો ‘રંજુ કી બેટિયાં’ની લીડ ઍક્ટ્રેસ રીના કપૂરનું કહેવું છે કે સિરિયલોમાં પહેલાં જે રીતે ભવ્ય વેડિંગ સીન્સ જોવા મળતા એ હવે નથી જોવા મળતા અને કદાચ નજીકના ભવિષ્યમાં પણ નહીં જોવા મળે, થૅન્ક્સ ટુ કોરોના! તાજેતરમાં ‘રંજુ કી બેટિયાં’માં રંજુની સૌથી મોટી દીકરી શાલુ (મોનિકા ચૌહાણ)નાં લગ્નની સીક્વન્સનું શૂટ કરવામાં આવ્યું છે અને આ દરમ્યાન રીના કપૂરે અનુભવ્યું કે વેડિંગ સીક્વન્સમાં હવે પહેલાં જેવો ઉત્સવનો માહોલ નથી. પહેલાં તો લગ્નના સીન માટે તૈયારીઓ જોરશોરથી ચાલતી, મેંદી, સંગીત વગેરેનાં અલગ ફંક્શન યોજાતાં. હવે એ ગ્રૅન્ડ સેલિબ્રેશન નથી જોવા મળતું.
રીના કપૂર કહે છે, ‘હવે પહેલાં જેવું બિલકુલ નથી રહ્યું. આખું વિશ્વ કોરોના મહામારી સામે લડી રહ્યું છે અને કોરોના વાઇરસને ફેલાતો અટકાવવા માટે ઓછા લોકોની સંખ્યામાં શૂટ કરવું અનિવાર્ય છે. ‘રંજુ કી બેટિયાં’નું શૂટ બહુ ઓછા ડેકોરેશન અને ઓછા લોકો સાથે પૂરું કરવામાં આવ્યું છે. કોણ કેવું લાગે છે એ વિશે ચર્ચા જ નથી થતી કેમ કે કપડાં અને જ્વેલરીની અછતને લીધે બધાએ સિમ્પલ લુક અપનાવ્યો છે. સૌથી મોટી ચૅલેન્જ એ હતી કે અમે ખુલ્લામાં ધોમધખતા તાપમાં શૂટ કર્યું છે અને મેકઅપ ન બગડે એનું ધ્યાન રાખ્યું છે.’
