ફિલ્મના રિલીઝનું પ્લેટફૉર્મ નહિ એની સ્ટોરી મહત્ત્વની છે:અદિતિ રાવ હૈદરી
ફિલ્મના રિલીઝનું પ્લેટફૉર્મ નહિ એની સ્ટોરી મહત્ત્વની છે:અદિતિ રાવ હૈદરી
અદિતિ રાવ હૈદરીનું કહેવું છે કે લૉકડાઉન દરમ્યાન ડિજિટલ પ્લૅટફૉર્મ આપણાં બેસ્ટ ફ્રેન્ડ્સ બન્યાં હતાં. તેણે ગયા વર્ષે મલયાલમ રોમૅન્ટિક-ડ્રામા ‘સુફિયમ સુજાતયમ’ દ્વારા ડિજિટલ પ્લૅટફૉર્મ પર એન્ટ્રી કરી હતી. ત્યાર બાદ તે તેલુગુ ઍક્શનમાં જોવા મળી હતી. હવે પરિણીતી ચોપડા સાથેની ‘ધ ગર્લ ઑન ધ ટ્રેન’ પણ ઑનલાઇન રિલીઝ થવાની છે. ડિજિટલ પ્લૅટફૉર્મની પ્રશંસા કરતાં અદિતિએ કહ્યું હતું કે ‘ડિજિટલ પ્લૅટફૉર્મનો ખરો અનુભવ મને ૨૦૨૦માં થયો હતો જ્યારે મારી બે ફિલ્મો રિલીઝ થઈ હતી. મેં રડતાં-રડતા એની શરૂઆત કરી હતી. જોકે ત્યાર બાદ મને એ ખૂબ જ અદ્ભુત લાગ્યું. મને એ બાબત ખૂબ જ સારી લાગી કે માત્ર એક ક્લિકમાં જ આખી ફિલ્મ જોઈ શકો છો. લોકોને સારી સ્ટોરી અને કન્ટેન્ટ જોઈતી હોય છે. હું ખૂબ રોમૅન્ટિક છું. મને થિયેટર પસંદ છે. થિયેટરમાં ફિલ્મો જોઈને જ આપણે બધા મોટા થયા છીએ. થિયેટરમાં હવે ફરીથી જવા માટે આપણે આતુર છીએ. લાર્જર ધૅન લાઇફ ફિલ્મ જોવા માટેનો ઉત્સાહ જ અલગ હોય છે. લૉકડાઉનને કારણે આપણને ડિજિટલ પ્લૅટફૉર્મ્સની અગત્ય સમજાઈ છે. લૉકડાઉન દરમ્યાન એ આપણાં બેસ્ટ ફ્રેન્ડ્સ બની ગયાં છે. આજે હું પૂરા વિશ્વાસ સાથે કહી શકું છું કે તમારી ફિલ્મો કયા પ્લૅટફૉર્મ પર રિલીઝ થાય છે એ મહત્ત્વનું નથી, સ્ટોરી પણ જરૂરી છે. ફિલ્મ બનાવવા કેટલો સમય લાગે છે, કન્ટેન્ટ, ટીમ, ડિરેક્ટરની સાથે આખી જર્ની આગળ વધવી એ બધું ખૂબ અગત્યનું છે. દરેક ફિલ્મનું નસીબ અલગ હોય છે. કેટલીક ફિલ્મો થિયેટર માટે તો કેટલીક ડિજિટલ પ્લૅટફૉર્મ્સ માટે બને છે. બન્ને વૅલિડ છે અને હંમેશાં આપણા માટે વિશેષ રહેશે.’
