અમિતાભ બચ્ચને અલીબાગમાં ખરીદ્યા ૬.૫૯ કરોડ રૂપિયાના ત્રણ પ્લૉટ

આ રોકાણ ‘ધ હાઉસ ઑફ અભિનંદન લોઢા’ના ધ ‘A’ અલીબાગ પ્રોજેક્ટનો ભાગ છે

અમિતાભ બચ્ચન

ઝડપથી વિકસી રહેલા અલીબાગમાં અમિતાભ બચ્ચને ૬.૫૯ કરોડ રૂપિયામાં ત્રણ પ્લૉટ ખરીદ્યા હોવાના રિપોર્ટ છે. અમિતાભના આ પ્લૉટ અલીબાગના મુનવલીમાં છે. દસ્તાવેજો પ્રમાણે બચ્ચન-પરિવારે રાયગડ જિલ્લાના અલીબાગ તાલુકાના મુનવલી ગામમાં એકસાથે ત્રણ પ્લૉટ ખરીદ્યા છે અને એનું રજિસ્ટ્રેશન ૭ ઑક્ટોબરે કરવામાં આવ્યું હતું.

મળતી માહિતી પ્રમાણે આ રોકાણ ‘ધ હાઉસ ઑફ અભિનંદન લોઢા’ના ધ ‘A’ અલીબાગ પ્રોજેક્ટનો ભાગ છે. આ ત્રણેય પ્લૉટ એકબીજા સાથે જોડાયેલા છે અને આ ત્રણેય પ્લૉટનો કુલ વિસ્તાર લગભગ ૯૫૫૭ ચોરસ ફુટ જેટલો થાય છે. આ ડીલનો પહેલો પ્લૉટ લગભગ ૪૦૪૭ ચોરસ ફુટનો, બીજો પ્લૉટ ૨૭૭૭ ચોરસ ફુટનો અને ત્રીજો પ્લૉટ ૨૭૩૪  ચોરસ ફુટનો છે.