આજે ટૉપ-ફોરના સ્પૉટ માટે ગુજરાત અને રાજસ્થાન વચ્ચે જામશે જબરદસ્ત રસાકસી

જયપુરમાં રાજસ્થાન સામે ત્રણમાંથી માત્ર એક મૅચ હાર્યું છે ગુજરાત, વૈભવ સૂર્યવંશીએ આ સ્ટેડિયમમાં જ ગુજરાત સામે ફટકારી હતી ૩૫ બૉલની સેન્ચુરી

મૅચનો સમય સાંજે ૭.૩૦ વાગ્યાથી

IPL 2026ની બાવનમી લીગ-સ્ટેજ મૅચ આજે જયપુરના સવાઈ માનસિંહ સ્ટેડિયમમાં રમાશે. રાજસ્થાન રૉયલ્સ અને ગુજરાત ટાઇટન્સની આ ટક્કર ટૉપ-ફોરના સ્પૉટ માટે મહત્ત્વપૂર્ણ સાબિત થશે. ૧૦ મૅચમાં ૬ જીત અને ૪ હાર સહિત ૧૨ પૉઇન્ટ અને +૦.૫૧૦ના નેટ રનરેટ સાથે રાજસ્થાન ચોથા ક્રમે છે, જ્યારે ગુજરાત ૧૦ મૅચમાં એટલી જ જીત-હાર સાથે ૧૨ પૉઇન્ટ અને -૦.૧૪૭ના નેટ રનરેટ સાથે પાંચમા ક્રમે છે. સીઝનની પહેલી ટક્કરમાં અમદાવાદમાં રાજસ્થાનના ૨૧૧ રનના ટાર્ગેટ સામે ૨૦૪ રન કરીને ગુજરાત ૬ રને હાર્યું હતું. આજે રાજસ્થાન સામે આ હારનો બદલો લઈને ગુજરાત ટૉપ-ફોરમાં એન્ટ્રી કરી શકે છે. ગુજરાતે છેલ્લી ત્રણ મૅચમાં ચેન્નઈ, બૅન્ગલોર અને પંજાબ સામે જીત મેળવી છે. રાજસ્થાનને પોતાની ૪ હાર છેલ્લી ૬ મૅચમાં મળી છે. જયપુરના સ્ટેડિયમમાં ગુજરાત ત્રણમાંથી બે મૅચ જીત્યું છે અને એક મૅચ હાર્યું છે. આ ત્રણેય મૅચ ગુજરાતે રાજસ્થાન સામે જ રમી હતી અને ૨૦૨૫ની અંતિમ ટક્કરમાં જ અહીં હાર મળી હતી. આ જ મૅચમાં વૈભવ સૂર્યવંશીએ ૩૫ બૉલમાં પોતાની પહેલી IPLસેન્ચુરી નોંધાવી હતી. વર્તમાન સીઝનમાં જયપુરના સ્ટેડિયમમાં હોમ-ટીમ રાજસ્થાન બે મૅચ રમી છે અને બન્નેમાં સનરાઇઝર્સ હૈદરાબાદ સામે પાંચ વિકેટે અને દિલ્હી કૅપિટલ્સ સામે ૭ વિકેટે હાર મળી છે. આ મેદાન પર રાજસ્થાન ૬૯ મૅચ રમ્યું છે એમાંથી ૪૩ જીત અને ૨૬ હાર મળી છે.

ADVERTISEMENT

પિન્ક પ્રૉમિસ પહેલ હેઠળ રાજસ્થાન આજે સંપૂર્ણ પિન્ક જર્સીમાં રમશે

ગુજરાત ટાઇટન્સ સામેની આજની મૅચમાં રાજસ્થાન રૉયલ્સના ખેલાડીઓ બ્લુ-પિન્કના મિશ્રણવાળી જર્સીને બદલે સંપૂર્ણ પિન્ક જર્સીમાં જોવા મળશે. રાજસ્થાન રૉયલ્સ ફાઉન્ડેશન રાજસ્થાનની ગ્રામીણ મહિલાઓના સન્માનમાં છેલ્લી બે સીઝનથી #PinkPromise પહેલ હેઠળ અનોખી પિન્ક જર્સી સાથે મેદાન પર ઊતરે છે. આ વખતની પિન્ક જર્સીમાં સૌર-પ્રેરિત પૅટર્ન અને ફાઉન્ડેશન દ્વારા સમર્થિત મહિલાઓનાં નામ સામેલ છે. આ ડિઝાઇન પહેલના મુખ્ય સંદેશ ‘ઔરત હૈ તો ભારત હૈ’ ને પ્રતિબિંબિત કરે છે. આજની મૅચમાં દરેક સિક્સ સાથે રાજસ્થાનનાં ૬ ઘરોને સોલર પૅનલ મળશે. આ પહેલનો હેતુ ગરીબ સમુદાયોમાં મહિલાઓ દ્વારા સંચાલિત વીજળીકરણ પ્રોજેક્ટ્સને ટેકો આપવાનો છે. આ ઝુંબેશ દ્વારા ૨૦૨૪માં ૨૬૦ ઘરોને સફળતાપૂર્વક વીજળી પૂરી પાડવામાં આવી હતી અને ૨૦૨૫માં એની પહોંચ ૫૨૦થી વધુ ઘરો સુધી વિસ્તૃત કરવામાં આવી હતી. આ મૅચની ટિકિટ અને પિન્ક જર્સીના વેચાણથી મળતા પૈસાનો ઉપયોગ મહિલાઓની આગેવાની હેઠળના ગ્રામીણ વિકાસ પ્રોજેક્ટ્સને ટેકો આપવામાં થશે.