કોહલીને પ્રપોઝ કરનાર અને અર્જુન સાથે ડિનર-ડેટ પર જનાર ક્રિકેટર ડૅની વ્યૉટની મીડિયામાં અસંખ્ય ખેલાડીઓ સાથે તસવીરો છે
ડેનિયેલ વ્યૉટ, અર્જુન તેન્ડુલકર
ઇંગ્લૅન્ડની ૩૧ વર્ષીય ઑલરાઉન્ડર ડેનિયેલ વ્યૉટ સવા બસો ઇન્ટરનેશનલ મૅચ રમી છે અને એમાં તેણે સાડાત્રણ હજાર રન બનાવવા ઉપરાંત ૭૩ વિકેટ પણ લીધી છે, પરંતુ તે પોતાના પર્ફોર્મન્સને લીધે ચર્ચામાં આવવાને બદલે મોટા ભાગે અલગ-અલગ ક્રિકેટર કે બીજી રમતના ખેલાડીઓ સાથેની દોસ્તીને કારણે સમયાંતરે ન્યુઝમાં ચમકતી રહી છે. બે દિવસ પહેલાંની જ વાત કરીએ. સચિન તેન્ડુલકરનો ક્રિકેટર-પુત્ર અર્જુન થોડા દિવસથી લંડનમાં છે અને ડૅની તરીકે જાણીતી આ બ્રિટિશ ખેલાડીએ તેની સાથે એક રેસ્ટોરાંમાં ડિનર લીધું હતું. ડૅનીએ પોતાની સામે બેઠેલા અર્જુનની તસવીર ખેંચીને સોશ્યલ મીડિયામાં શૅર કરી હતી.
આ એ જ બ્રિટિશ મહિલા ખેલાડી છે જેણે થોડા વર્ષો પહેલાં વિરાટ કોહલીને સોશ્યલ મીડિયામાં પ્રપોઝ કરીને સનસનાટી મચાવી દીધી હતી. ડૅની વ્યૉટ અગાઉ કેવિન પીટરસન તેમ જ બીજા કેટલાક ઇંગ્લિશ ક્રિકેટરો અને ટેનિસ-ગ્રેટ નોવાક જૉકોવિચને મળી ચૂકી છે. યુઝવેન્દ્ર ચહલ સાથે વ્યૉટે મીડિયામાં મજાક-મસ્તીભર્યાં ચૅટ કર્યાં હતાં અને અફઘાનિસ્તાનના ઑલરાઉન્ડર રાશિદ ખાનને પણ તે મળી ચૂકી છે.