થોડા દિવસ પહેલાં જ ચીનમાં લૅન્ટર્ન ફેસ્ટિવલ અને ચાઇનીઝ ન્યુ યરની ઉજવણી થઈ હતી
ચીનનાં ગામડાંઓમાં આજે પણ આ પરંપરા નિભાવવામાં આવે છે
થોડા દિવસ પહેલાં જ ચીનમાં લૅન્ટર્ન ફેસ્ટિવલ અને ચાઇનીઝ ન્યુ યરની ઉજવણી થઈ હતી. આ ઉત્સવમાં કેટલાક ચીની અંતરિયાળ વિસ્તારોમાં ટૉઇલેટની પૂજા કરવાનો રિવાજ છે. આ એક પ્રકારનું અનુષ્ઠાન જેવું હોય છે જે જિગુ અથવા તો પર્પલ લેડી નામની રક્ષક દેવીના માનમાં ઊજવાય છે. માન્યતા છે કે પ્રાચીન સમયમાં એક મહિલાને ઈર્ષ્યાને કારણે ટૉઇલેટમાં જ મારી નાખવામાં આવી હતી. તે મૃત મહિલાને પછી જિગુ અને પર્પલ લેડી માનવામાં આવે છે. એવું મનાય છે કે મહિલાઓની એ રક્ષક છે. આ પૂજામાં પહેલાં ટૉઇલેટ અને બાથરૂમની સફાઈ કરવા માટે એક નવુંનક્કોર કપડું વાપરવામાં આવે છે. આ કપડાને સાફ કરીને એમાંથી દેવીનું પૂતળું બનાવાય છે. એને ટૉઇલેટ કે કિચનની પાસે રાખીને એની સામે અગરબત્તી અને ધૂપ સળગાવવામાં આવે છે. એ પછી દેવીના હાલચાલ પૂછવામાં આવે છે. આ દેવી નવા વર્ષે ઘરમાં સુખસમૃદ્ધિ અને ખેતી કેવી રહેશે એનું ભવિષ્ય પણ ભાખી આપે છે. માન્યતા છે કે દેવીનું પૂતળું હલનચલન કરીને એના જવાબો આપે છે. ચીનનાં ગામડાંઓમાં આજે પણ આ પરંપરા નિભાવવામાં આવે છે.
