ખાડી બચાવવા રશિયન ડાન્સરે થીજેલી સપાટી પર પર્ફોર્મ કર્યું

ખાડી બચાવવા રશિયન ડાન્સરે થીજેલી સપાટી પર પર્ફોર્મ કર્યું

રશિયન ડાન્સર

પર્યાવરણના રક્ષણ માટે આપણા દેશમાં આપણે અનેક અવનવાં અભિયાનો અને આંદોલનો જોયાં છે. દરેક દેશમાં ત્યાંની સંસ્કૃતિ, સંસ્કાર, ખાસિયત અને પ્રણાલી મુજબ સામાન્ય જનતામાંથી પ્રતિક્રિયા જોવા મળતી હોય છે. આપણા દેશમાં આંદોલનો, દેખાવો કે રસ્તા રોકો થાય તો અન્ય દેશોમાં ત્યાંની રીત મુજબ વિરોધ થતા હોય છે.

રશિયાની એક ડાન્સરે પોતાનો દેશ જે પ્રકારની ટૅલન્ટ માટે જાણીતો છે એને અનુરૂપ પ્રતિક્રિયા વ્યક્ત કરી છે. તેણે ડાન્સ કરીને એક અખાત (ખાડી)ને બચાવવા માટેની ઝુંબેશમાં લોકોને સામેલ થવાનો અનુરોધ કર્યો છે.

ADVERTISEMENT

બેટરેઇનયા બે નામની ખાડીમાં અનાજની તોતિંગ કોઠી બેસાડવા સહિતનો એક માતબર પ્રકલ્પ અમલમાં મૂકવામાં આવી રહ્યો હોવાના અહેવાલ બહાર આવતાં સ્થાનિક લોકોનો વિરોધ થઈ રહ્યો છે અને આ સ્થળના પર્યાવરણને બગાડથી બચાવવા અને લોકોનું ધ્યાન ખેંચવા લિમિરા બગૌત્દિનોવ નામની આ ડાન્સરે ખાડીના થીજેલા પાણીની સપાટી પર ડાન્સ કર્યો હતો.

રશિયામાં ગલ્ફ ઑફ ફિનલૅન્ડને એના અસલ, કુદરતી રૂપમાં લાવવા માટે પ્રમુખ વ્લાદિમીર પુતિનને સંબોધીને કરવામાં આવેલી ઑનલાઇન પિટિશનને સમર્થન આપવાનો પ્રયાસ પણ આ નૃત્યાંગનાએ કર્યો હતો.

નીચા તાપમાનની ઠંડીમાં બર્ફીલી સપાટી પર કરેલા ડાન્સની લિમિરાએ ફિલ્મ ઉતારી છે. સેન્ટ પીટર્સબર્ગથી ૫૦ કિલોમીટર દૂર કરેલા આ ડાન્સનો વિડિયો સોશ્યલ-ઑનલાઇન મીડિયા પર પોસ્ટ પણ કર્યો છે અને એને અનેક લાઇક્સ મળી છે.