ભારતમાં ૨૦૨૬ સુધીમાં ઍર-ટૅક્સીનું સપનું હકીકત બનવા જઈ રહ્યું છે
લાઇફમસાલા
ઍર-ટૅક્સી
ભારતમાં ૨૦૨૬ સુધીમાં ઍર-ટૅક્સીનું સપનું હકીકત બનવા જઈ રહ્યું છે. સૌથી પહેલી ઍર-ટૅક્સી દિલ્હીના બિઝનેસ-હબ કનૉટ પ્લેસથી દિલ્હીની ભાગોળે આવેલા ગુરુગ્રામ વચ્ચે ઊડશે. હાલમાં આ બે સ્થળ વચ્ચે કારથી પ્રવાસ કરવામાં એકાદ કલાકનો સમય લાગે છે, પણ ઍર-ટૅક્સીમાં એ ઘટીને માત્ર ૭ મિનિટનો થઈ જશે. આ માટે કૅલિફૉર્નિયાની eVTOL કંપની આર્ચર એવિયેશને ભારતમાં ઇન્ડિગો ઍરલાઇન્સની માલિક કંપની ઇન્ટરગ્લોબ એવિયેશન સાથે જૉઇન્ટ વેન્ચર શરૂ કરવાની જાહેરાત કરી છે. આ કંપની રોજ કેટલી ટ્રિપ ઉડાવવી અને એનો ખર્ચ કેવી રીતે ઓછો કરવો એના પર કામગીરી કરી રહી છે. eVTOLએ ઇલેક્ટ્રિક વર્ટિકલ ટેકઑફ ઍન્ડ લૅન્ડિંગનું શૉર્ટ ફૉર્મ છે. ઍર-ટૅક્સીની આ સફર સસ્તી નહીં હોય, કારણ કે આ કંપની ૭ મિનિટની રાઇડનો ચાર્જ આશરે ૩૦૦૦ રૂપિયા પ્રતિ વ્યક્તિ રાખશે, જે હાલના ઉબરના એક તરફના ભાડાની સરખામણીમાં પાંચ ગણી રકમ છે. આ ઍર-ટૅક્સી હેલિકૉપ્ટરની જેમ ઊડશે અને એમ જ ઊતરશે, પણ એ ઇલેક્ટ્રિક હોવાથી પ્રદૂષણ નહીં કરે.