Shashi Tharoor: ઑપરેશન સિંદૂરને લઈને કૉંગ્રેસ સાંસદ શશિ થરૂરે એક લેખ દ્વારા વડાપ્રધાન નરેન્દ્ર મોદીના વખાણ કર્યા હતા, જેના પર મલ્લિકાર્જુન ખરગેએ કટાક્ષ કર્યો છે.
શશિ થરૂર (ફાઈલ તસવીર)
Shashi Tharoor: ઑપરેશન સિંદૂરને લઈને કૉંગ્રેસ સાંસદ શશિ થરૂરે એક લેખ દ્વારા વડાપ્રધાન નરેન્દ્ર મોદીના વખાણ કર્યા હતા, જેના પર મલ્લિકાર્જુન ખરગેએ કટાક્ષ કર્યો છે.
વડાપ્રધાન નરેન્દ્ર મોદીના વારંવાર વખાણ કરવાને લઈને કૉંગ્રેસના રાષ્ટ્રીય અધ્યક્ષ મલ્લિકાર્જુન ખરગેએ પાર્ટીના સાંસદ શશિ થરૂર પર કટાક્ષ કર્યો છે. ખરગેએ કહ્યું કે અમારે માટે દેશ પહેલા છે, જ્યારે કેટલાક લોકો માટે પીએમ મોદી પહેલા છે. કૉંગ્રેસ અધ્યક્ષનું આ નિવેદન એવા સમયે આવ્યું છે જ્યારે શશિ થરૂર અને કૉંગ્રેસના આલાકમાન વચ્ચે મતભેદના સમાચાર બધાની સામે આવી રહ્યા છે.
ADVERTISEMENT
ખરગેના કટાક્ષ બાદ આવી થરૂરની પહેલી પ્રતિક્રિયા
કૉંગ્રેસ અધ્યક્ષ ખરગેના નિવેદન બાદ તિરુવનંતપુરમના સાંસદ શશિ થરૂરની પ્રતિક્રિયા સામે આવી છે. શશિ થરૂરે એક્સ પર પોસ્ટ કરીને કહ્યું, "ઉડવા માટે પરવાનગી ન માગો, પાંખ તમારી છે અને આકાશ કોઈનું નથી." આ પહેલા ખરગેએ કહ્યું, "શશિ થરૂરની અંગ્રેજી ખૂબ જ સારી છે. હું અંગ્રેજી બરાબર રીતે વાંચી નથી શકતો. તેમની ભાષા ખૂબ જ સારી છે આથી અમે તેમને કૉંગ્રેસ કાર્યસમિતિના સભ્ય બનાવ્યા છે."
કૉંગ્રેસ અધ્યક્ષે કહ્યું, "પહલગામ આતંકવાદી હુમલામાં 26 નિર્દોષ લોકો માર્યા ગયા. આખો વિપક્ષ સેના સાથે ઉભો છે. અમે કહ્યું હતું કે દેશ પહેલા આવે છે અને પાર્ટી પછી. કેટલાક લોકો માને છે કે મોદી પહેલા આવે છે અને દેશ પછી. આપણે શું કરી શકીએ?" તેમણે આરોપ લગાવ્યો કે મોદી સરકારના શાસનમાં ચૂંટણી પંચ કઠપૂતળી બની ગયું છે.
ખરગેએ ચૂંટણી પંચ પર ગંભીર આરોપ લગાવ્યા
ખરગેએ કહ્યું, "રાહુલ ગાંધી આંકડાઓ સાથે પોતાની વાત કહી રહ્યા છે, પરંતુ ચૂંટણી પંચ તેને સ્વીકારવા તૈયાર નથી. ચૂંટણી પંચ કઠપૂતળી બની ગયું છે, જે ભાજપ પાસે છે. અમે મહારાષ્ટ્રમાં લોકસભા ચૂંટણી દરમિયાન બેઠકો જીતી હતી, પરંતુ 5 મહિના પછી વિધાનસભા ચૂંટણીમાં આંકડા બદલાઈ ગયા. જ્યારે 5 વર્ષમાં મતદાર યાદી બદલાય છે, ત્યારે 2-3 ટકાનો વધારો થાય છે, પરંતુ અહીં માત્ર 5 મહિનામાં 8 ટકાનો વધારો જોવા મળ્યો છે."
તેમણે કહ્યું, "મેં ઘણી ચૂંટણીઓ લડી છે અને બીજાઓને લડાવ્યા છે, પરંતુ મેં ક્યારેય આવું કંઈ જોયું નથી. અમે સતત આ મુદ્દો ઉઠાવી રહ્યા છીએ, પરંતુ ચૂંટણી પંચ કંઈપણ સાંભળવા તૈયાર નથી, કારણ કે સરકારનું દરેક જગ્યાએ નિયંત્રણ છે. RSS ના લોકોને દરેક જગ્યાએ મૂકવામાં આવ્યા છે અને બીજાઓ માટે કોઈ સ્થાન નથી."
કૉંગ્રેસમાં હાલમાં બધું બરાબર નથી. તિરુવનંતપુરમના સાંસદ શશિ થરૂર અને કૉંગ્રેસ પ્રમુખ મલ્લિકાર્જુન ખરગે વચ્ચેના તાજેતરના તણાવ પરથી આ સ્પષ્ટ થાય છે. હકીકતમાં, ખરગેએ નામ લીધા વિના થરૂર પર નિશાન સાધ્યું હતું અને કહ્યું હતું કે કેટલાક લોકો માટે મોદી પહેલા આવે છે અને દેશ પછી.
