થાણેના કોલશેતમાં ટીનેજર પર તેના જ ૩ કઝિન દ્વારા બળાત્કાર

૬ મહિનાથી જાતીય અત્યાચાર સહન કરી રહેલી યુવતીએ ડરને કારણે પરિવારથી વાત છુપાવી હતી

પ્રતીકાત્મક તસવીર

થાણેના કોલશેતમાં રહેતી ૧૯ વર્ષની ટીનેજર પર તેના જ ૩ કઝિન ભાઈઓ દ્વારા છેલ્લા ૬ મહિનાથી બળાત્કાર થતો હોવાની ચોંકાવનારી ઘટના બહાર આવી છે. કોપરી પોલીસ-સ્ટેશનમાં આ સંદર્ભે ફર્સ્ટ ઇન્ફર્મેશન રિપોર્ટ (FIR) દાખલ કરવામાં આવ્યો હતો જે નોંધ્યા બાદ એને કાપુરબાવડી પોલીસ-સ્ટેશનને ટ્રાન્સફર કરવામાં આવ્યો છે.

કાપુરબાવડી પોલીસ-સ્ટેશનનાં સિનિયર પોલીસ-ઇન્સ્પેક્ટર મંજુષા ભોંગલેએ આ બાબતે માહિતી આપતાં ‘મિડ-ડે’ને કહ્યું હતું કે ‘ટીનેજર પર લગભગ ૬ મહિનાથી તેના ૩ કઝિન બળાત્કાર કરી રહ્યા હતા. જોકે ડરી ગયેલી ટીનેજરે પહેલાં આ બાબતે પરિવારને જણાવ્યું નહોતું. હવે તેણે હિંમત કરીને પરિવારને જાણ કરતાં તેમણે ફરિયાદ નોંધાવી હતી અને એ પછી અમે ઍક્શન લીધી છે. બે આરોપીઓ ૨૦ અને ૨૩ વર્ષના છે અને એક સગીર છે. અમે તપાસ કરીને બે આરોપીઓને ઝડપી લીધા છે, જ્યારે અન્ય એક સગીર આરોપીની અટકાયત કરીને તેને ભિવંડીની જુવેનાઇલ કોર્ટમાં હાજર કરવામાં આવ્યો હતો. હાલ કેસની વધુ તપાસ ચાલી રહી છે.’