થાણે અને મુલુંડ વચ્ચે બની રહેલા સ્ટેશનને ધર્મવીર આનંદ દીઘેનું નામ આપવાની શિવસેનાની માગણી

૨૫૦ કરોડ રૂપિયાના ખર્ચે નવું સ્ટેશન બનાવવામાં આવશે

નરેશ મ્હસ્કે

લાંબા વખતથી થાણે અને મુલુંડ વચ્ચે સ્ટેશન બનાવવાનો પ્લાન થઈ રહ્યો હતો. એ માટે હવે રેલવે મિનિસ્ટર અશ્વિની વૈષ્ણવે એ માગણી મંજૂર કરી છે અને પ્રોજેક્ટ માટે ૨૫૦ કરોડ રૂપિયા ફાળવ્યા છે. ટૂંક સમયમાં એનું કામ ચાલુ કરવામાં આવશે. વળી એ સ્ટેશનનું નામ ધર્મવીર આનંદ દીઘે સ્ટેશન રાખવામાં આવે એવી માગણી કરાઈ હોવાનું શિવસેનાના સંસદસભ્ય નરેશ મ્હસ્કેએ જણાવ્યું છે. 

નરેશ મ્હસ્કે અને શિવસેનાના અન્ય સંસદસભ્ય શ્રીકાંત શિંદેએ આ સંદર્ભે ૨૦૨૪માં રજૂઆત કરી હતી. હવે અશ્વિની વૈષ્ણવે આ સ્ટેશન માટે ૨૫૦ કરોડ રૂપિયા મંજૂર કર્યા છે અને એ પ્રપોઝલ રેલવે બોર્ડને મોકલવામાં આવી છે. મૂળ આ સ્ટેશન માટે ૨૦૧૫થી રજૂઆત કરવામાં આવી રહી હતી. જોકે કોઈ ને કોઈ કારણસર એ કામ આગળ વધી નહોતું રહ્યું. એ વખતે થાણે મ્યુનિસિપલ કૉર્પોરેશન (TMC)એ ફન્ડ આપવાની તૈયારી દર્શાવી હતી અને સાથે અમુક શરતો પણ મૂકવામાં આવી હતી. આખરે નરેશ મ્હસ્કેએ રેલવે મિનિસ્ટ્રીને વિનંતી કરી એ પ્રોજેક્ટ ટેકઓવર કરવા કહ્યું હતું. હવે રેલવે મિનિસ્ટ્રીએ એ માટે ફન્ડ ફાળવવાની જાહેરાત કરી છે એથી એ સ્ટેશનનનું કામ આગળ વધી શકશે. થાણે અને મુલુંડના હજારો પ્રવાસીઓને આ સ્ટેશનથી લાભ થશે.