આ વર્ષે એન્જિનિયરિંગ અને ફાર્મસીનાં ઍડ્‍મિશનની પ્રક્રિયામાં થશે વિલંબ

NEET-UG પેપર લીક કાંડને કારણે બાકી વિદ્યાર્થીઓને હાલાકી? : મહારાષ્ટ્રના એજ્યુકેશન મિનિસ્ટર ચંદ્રકાંત પાટીલે આપી માહિતી

ચંદ્રકાંત પાટીલ

નૅશનલ એલિજિબિલિટી કમ એન્ટ્રન્સ ટેસ્ટ-અન્ડરગ્રૅજ્યુએટ (NEET-UG) પેપર-લીકને કારણે પરીક્ષા પાછળ ઠેલાઈ હોવાથી રાજ્યમાં એન્જિનિયરિંગ અને ફાર્મસી કૉલેજમાં ઍડ્‍મિશનની પ્રક્રિયામાં પણ વિલંબ થશે એવું રાજ્યના ​એજ્યુકેશન મિનિસ્ટર ચંદ્રકાંત પાટીલે જણાવ્યું હતું. ઍડ્‍મિશન મોડું થવાનું હોવાથી શૈક્ષણિક પ્રવૃત્તિઓ પણ મોડેથી શરૂ થશે એવી માહિતી તેમણે આપી હતી. ઑલ ઇન્ડિયા ક્વોટા હેઠળ આવતી એન્જિનિયરિંગની ૯ બ્રાન્ચનાં ઍડ્‍મિશન અને ફાર્મસીનાં ૧૫ ટકા ઍડ્‍મિશન NEET-UGની પરીક્ષા પછી જ આપી શકાય એમ હોવાથી એની રીએક્ઝામ ન થાય ત્યાં સુધી ઍડ્‍મિશનની પ્રક્રિયા શરૂ કરી શકાય એ શક્ય નથી. એ સિવાય જે વિદ્યાર્થીઓ NEET-UGમાં સારું પ્રદર્શન નથી કરતા તેઓ પછીથી એન્જિનિયરિંગનો અભ્યાસ કરવાનું પસંદ કરતા હોય છે જેને પગલે તેમની પરીક્ષા ન લેવાય ત્યાં સુધી એન્જિનિયરિંગનાં ઍડ્‍મિશન પણ શરૂ નહીં કરી શકાય એવું ચંદ્રકાંત પાટીલે જણાવ્યું હતું.