મુંબઈ (Mumbai)થી નવી મુંબઈ (Navi Mumbai)ની મુસાફરી માત્ર 20 મિનિટમાં પૂરી કરવા માટે MTHLનું નિર્માણ કરવામાં આવી રહ્યું છે. આ પુલ પરથી રોજના હજારો વાહનો પસાર થશે
મહારાષ્ટ્ર ચીફ મિનિસ્ટર એકનાથ શિંદે
મુંબઈ મેટ્રોપોલિટન રિજન ડેવલપમેન્ટ ઑથોરિટી (MMRDA)એ રાજ્યમાં પ્રથમ વખત ઓપન રોડ ટોલિંગ સિસ્ટમ શરૂ કરવાનો નિર્ણય લીધો છે. આ ટેક્નોલોજી દ્વારા શિવડી-ન્હાસેવા ટ્રાન્સ હાર્બર લિન્ક પ્રોજેક્ટ (MTHL) પર ટોલ વસૂલવામાં આવશે. આ ટેક્નિક હેઠળ ટોલ પોઈન્ટ પર વાહનોને રોકવામાં આવશે નહીં. વાહનો રોકાયા વિના ઝડપથી મુસાફરી કરીને સમુદ્ર પર બનેલા 22 કિલોમીટર લાંબા પુલને પાર કરી શકશે. આ ટેકનીક હેઠળ, વાહનો MTHLમાં પ્રવેશતાની સાથે જ FASTagમાંથી ટોલની રકમ કાપવામાં આવશે.
સિંગાપોરમાં આ ટેકનિકનો ઉપયોગ થાય છે. તે જ સમયે, ફાસ્ટેગ સ્ટિક વિનાના વાહનો પાસેથી નોન-સ્ટોપ ટોલ વસૂલવા માટે ટેક્નોલોજી વિકસાવવામાં આવી રહી છે. MMRDA કમિશનર SVR શ્રીનિવાસના જણાવ્યા અનુસાર, FASTag વગરના વાહનો પાસેથી ટોલ વસૂલવા માટે ટ્રાન્સપોર્ટ વિભાગ સાથે મળીને ટેક્નોલોજી વિકસાવવામાં આવી રહી છે. ટેક્નોલોજી હેઠળ, MTHLમાં પ્રવેશતા વાહનોના નંબર પ્લેટ રીડિંગ ઉપકરણો ત્યાં સ્થાપિત કરવામાં આવશે. વાહન નંબરના આધારે ઑનલાઈન ટોલના પૈસા લેવામાં આવશે.
ADVERTISEMENT
શા માટે જરૂર છે
મુંબઈ (Mumbai)થી નવી મુંબઈ (Navi Mumbai)ની મુસાફરી માત્ર 20 મિનિટમાં પૂરી કરવા માટે MTHLનું નિર્માણ કરવામાં આવી રહ્યું છે. આ પુલ પરથી રોજના હજારો વાહનો પસાર થશે. આવી સ્થિતિમાં, જો ટોલ પોઈન્ટ પર વાહનોની લાંબી લાઈનો હોય તો વાહનો માટે 20 મિનિટમાં મુસાફરી પૂર્ણ કરવી શક્ય બનશે નહીં. તેથી, તેના દાવાને પરિપૂર્ણ કરવા માટે, MMRDAએ ઓપન રોડ ટોલિંગ સિસ્ટમ સ્થાપિત કરવાનો નિર્ણય લીધો છે. હાલમાં, મુંબઈથી નવી મુંબઈની મુસાફરીમાં લગભગ 2 કલાકનો સમય લાગે છે.
90 ટકા કામ પૂર્ણ
MMRDAએ સમુદ્ર પર પુલ તૈયાર કરવાનું 90 ટકા કામ પૂર્ણ કરી લીધું છે. 2023ના અંત સુધીમાં આ પુલને વાહનોની અવરજવર માટે ખુલ્લો મૂકવામાં આવશે. 22 કિમી લાંબા પુલમાંથી 16.5 કિમી પાણીમાં હશે, જ્યારે 5.5 કિમી જમીન પર હશે. બ્રિજને બંને તરફ જમીન સાથે જોડવાની કામગીરી પૂર્ણ કરવામાં આવી છે.
આ પણ વાંચો: બીકેસીની ધીરુભાઈ અંબાણી ઇન્ટરનૅશનલ સ્કૂલને મળ્યો ટાઇમ-બૉમ્બ મુકાયાનો ફોન
CMએ કર્યું નિરીક્ષણ
મુખ્યપ્રધાન એકનાથ શિંદે (Eknath Shinde)એ બુધવારે ચાલી રહેલા MTHL નિર્માણ કાર્યની સમીક્ષા કરી હતી. બુધવારના રોજ MTHL ના પેકેજ-2 પર સૌથી લાંબી સ્ટીલ ડેક નાખવામાં આવી હતી. આ ડેક 180 મીટર લાંબી હતી, જેનું વજન 2300 મેટ્રિક ટન હતું. મુખ્યપ્રધાનના જણાવ્યા અનુસાર સિંગાપોરમાં ઓપન રોડ ટોલિંગ સિસ્ટમનો ઉપયોગ કરવામાં આવે છે. ભારતમાં આ ટેક્નોલોજીનો ઉપયોગ શરૂ કરવાના પ્રયાસો કરવામાં આવી રહ્યા છે, જેના કારણે વાહનચાલકોનો સમય બચશે. આ સાથે પ્રવાસ પણ ટૂંક સમયમાં પૂર્ણ થશે.
