ફરિયાદીએ ૧૭.૮૨ લાખ રૂપિયા ગુમાવ્યા હતા
પ્રતીકાત્મક તસવીર
મુંબઈની સાઇબર પોલીસ નૉર્થ રીજનના અધિકારીઓ અનેક લોકોને લાખો રૂપિયામાં છેતરનાર ટોળકીના સભ્યોને રાજસ્થાન અને ઉત્તર પ્રદેશ જઈને પકડી લાવ્યા છે. આ સંદર્ભે એક કેસ ઑગસ્ટમાં નોંધાયો હતો, જેમાં ફરિયાદીએ ૧૭.૮૨ લાખ રૂપિયા ગુમાવ્યા હતા એની તપાસમાં આ રૅકેટનો પર્દાફાશ થયો હતો.
ઑનલાઇન ખરીદ-વેચાણ માટેની સાઇટ પર આ કેસના ફરિયાદીએ તેનું જૂનું ફર્નિચર વેચવા કાઢ્યું હતું અને એના ફોટો પણ પોસ્ટ કર્યા હતા. એના જવાબમાં આ ટોળકીના સભ્યોએ તેનો કૉન્ટૅક્ટ કરી એ ફર્નિચર ખરીદવા રસ દાખવ્યો હતો અને પેમેન્ટ કરવા તેને બૅન્ક ડીટેલ્સ પૂછી હતી અને ક્યુઆર કોડ પણ મગાવ્યો હતો. એ પછી આરોપીએ તેને ૯૦૦૦ રૂપિયા ટ્રાન્સફર કર્યા હતા. જોકે એ પછી તેમણે ફોન કરીને ફરિયાદીને કહ્યું કે એ પૈસા પાછા મોકલાવે, બીજાં બે અકાઉન્ટમાંથી તેઓ પૈસા ફરી ટ્રાન્સફર કરશે. એથી ફરિયાદીએ તેમના પર વિશ્વાસ મૂકી એ પાછા મોકલાવ્યા હતા અને આ પ્રોસસમાં આરોપીઓએ તેના બૅન્ક અકાઉન્ટનું ઍક્સેસ મેળવી તેના અકાઉન્ટમાંથી ૧૭.૮૨ લાખ સેરવી લીધા હતા. એથી ફરિયાદીએ ત્યાર બાદ ફરિયાદ નોંધાવી હતી.
સાઇબર પોલીસ આ કેસની ઝીણવટભરી તપાસ કરી રાજસ્થાનથી ૩ આરોપી અને ઉત્તર પ્રદેશથી એક આરોપીને પકડી લાવી હતી. વધુ તપાસ કરતાં જણાઈ આવ્યું કે આ આરોપીઓ રીઢા ગુનેગાર છે અને તેમની સામે અત્યાર સુધીમાં કુલ ૫૭૭ કેસ નોંધાયા છે, જેમાંથી ૨૬૯ કેસ તો માત્ર મહારાષ્ટ્રમાં જ અને ૧૦ કેસ મુંબઈમાં નોંધાયા છે. આ ટોળકી પાસેથી કુલ બે લાખ રૂપિયાની કૅશ, ૯ મોબાઇલ, વિવિધ બૅન્કોનાં ૩૨ એટીએમ કાર્ડ મળી આવ્યાં હતાં. લોકોને છેતરવા તેમણે ૮૩૫ મોબાઇલ-નંબર, ૩૮ આઇએમઆઇ-નંબરનો ઉપયોગ કર્યો હોવાનું તપાસમાં જણાઈ આવ્યું હતું.
