મહાલક્ષ્મીમાં સાત રસ્તા અને રેસકોર્સને જોડતા બ્રિજની ડેડલાઇન ૩૧ ડિસેમ્બર

BMCના બ્રિજ વિભાગે હવે એ બ્રિજ પૂર્ણ કરવા માટે ૩૧ ડિસેમ્બરનો લક્ષ્યાંક નક્કી કર્યો છે

કેશવરાવ ખાડ્યે માર્ગ પર બની રહેલા પુલથી સાત રસ્તા અને મહાલક્ષ્મી રેસકોર્સ વચ્ચેની અવરજવરની સુવિધામાં સુધારો થવાની અપેક્ષા છે. તસવીર/બીએમસી

મહાલક્ષ્મી ડેવલપમેન્ટ પ્લાન હેઠળ મહાલક્ષ્મી-ઈસ્ટના સાત રસ્તા અને મહાલક્ષ્મી-વેસ્ટના રેસકોર્સને જોડતો વેસ્ટર્ન રેલવે પરથી પસાર થતો કેબલ-સ્ટેડ બ્રિજ બૃહન્મુંબઈ મ્યુનિસિપલ કૉર્પોરેશન (BMC) બનાવી રહી છે. BMCના બ્રિજ વિભાગે હવે એ બ્રિજ પૂર્ણ કરવા માટે ૩૧ ડિસેમ્બરનો લક્ષ્યાંક નક્કી કર્યો છે.
આ કેબલ-સ્ટેડ બ્રિજ ૮૦૩ મીટર લાંબો અને ૧૭.૨ મીટર પહોળો હશે, જ્યારે રેલવેસીમાની અંદર એની પહોળાઈ ૨૩.૦૧ મીટર હશે. કેબલ-સ્ટેડ બ્રિજને ટેકો આપતો ૭૮.૫ મીટર ઊંચો પાયલૉન (સ્ટીલનો મોટો પિલર) પહેલેથી જ બનાવવામાં આવ્યો છે. થાંભલાથી ૯૫ મીટર લાંબો વેસ્ટ સાઇડનો સ્પૅન પૂરો થઈ ગયો છે, જ્યારે ૧૬૫ મીટરનો ઈસ્ટનો સ્પૅન રેલવે-પરિસરમાં બનાવવામાં આવશે. BMCને ટ્રૅકની ઉપર સુરક્ષિત રીતે કામ હાથ ધરવા માટે જરૂરી રેલવે-બ્લૉક મળશે ત્યારે એ કામ થઈ શકશે. 
પાયલૉનની વેસ્ટ સાઇડ મોટા ભાગના થાંભલા બાંધવામાં આવ્યા છે. જોકે ટ્રાફિક-ડાઇવર્ઝનની જરૂરિયાતોને કારણે પાંચ થાંભલા પર કામ હજી 
બાકી છે.
મુંબઈ ટ્રાફિક પોલીસ પાસેથી પરવાનગી મેળવ્યા પછી BMC ટ્રાફિક-ડાઇવર્ઝનનો અમલ કરશે. તૈયારીઓના ભાગરૂપે BMC કૉન્ક્રીટ સર્વિસ રોડ બનાવી રહી છે. આ વિસ્તારમાં યુટિલિટી વર્ક્સ પણ હાથ ધરવામાં આવી રહ્યાં છે. જરૂરી પરવાનગીઓ મળી ગયા પછી ટ્રાફિક પોલીસ સાથે કો-ઑર્ડિનેશન કરીને ટ્રાફિકને સર્વિસ રોડ પર ખસેડવામાં આવશે.