Cockroach Janata Party: કોકરોચ જનતા પાર્ટી (CJP)ના સ્થાપક અભિજીત દિપકેએ કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની ફરી એકવાર માંગ કરી છે.
પુણેમાં વિરોધ કરશે કૉકરોચ જનતા પાર્ટી (ફાઇલ તસવીર)
કૉકરોચ જનતા પાર્ટી (CJP)ના સ્થાપક અભિજીત દિપકેએ કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની ફરી એકવાર માગ કરી છે. દિપકેએ આરોપ લગાવ્યો છે કે રાષ્ટ્રીય સ્તરની વિવિધ પરીક્ષાઓમાં વારંવાર સામે આવતી ગેરરીતિઓને કારણે લાખો વિદ્યાર્થીઓના ભવિષ્ય પર નકારાત્મક અસર પડી છે.
બુધવારે પુણેમાં યોજાયેલી પ્રેસ કોન્ફરન્સ દરમિયાન દિપકેએ જણાવ્યું હતું કે NEET, CBSE અને CUET જેવી પરીક્ષાઓ સાથે જોડાયેલી સમસ્યાઓના કારણે દેશભરના વિદ્યાર્થીઓ મુશ્કેલીમાં મુકાયા છે. તેમણે કહ્યું કે હવે યુવાનો તેમના શિક્ષણ અને કારકિર્દી સાથે જોડાયેલા મુદ્દાઓ પર મૌન રહેવા તૈયાર નથી.
ADVERTISEMENT
દિપકેએ દાવો કર્યો કે પરીક્ષા પ્રણાલીમાં રહેલી ખામીઓ સામે દેશના યુવાનો હવે ખુલ્લેઆમ અવાજ ઉઠાવવા માટે તૈયાર છે. તેમણે કહ્યું, "હવે એક વાત સાબિત થઈ ગઈ છે કે દેશના યુવાનો ડરશે નહીં અને પાછળ પણ નહીં હટે."
તેમણે વધુમાં આરોપ લગાવ્યો કે પરીક્ષાઓ સાથે જોડાયેલી સમસ્યાઓને કારણે અનેક વિદ્યાર્થીઓએ આત્મહત્યા જેવા પગલાં ભર્યા છે, જેના માટે જવાબદારી નક્કી થવી જરૂરી છે.
13 જૂન સુધીનું અલ્ટિમેટમ
દિપકેએ જણાવ્યું કે તેમની પાર્ટીએ 6 જૂને નવી દિલ્હીના જંતર-મંતર ખાતે યોજાયેલા વિરોધ પ્રદર્શનમાં ધર્મેન્દ્ર પ્રધાનના તાત્કાલિક રાજીનામાની માગ કરી હતી. તેમણે કહ્યું કે શિક્ષણ મંત્રીને 13 જૂન સુધીનો સમય આપવામાં આવ્યો છે.
તેમના જણાવ્યા મુજબ, જો આ સમયમર્યાદા સુધી રાજીનામું નહીં આવે તો કૉકરોચ જનતા પાર્ટી દેશવ્યાપી આંદોલન શરૂ કરશે.
"કોઈને તો જવાબદારી લેવી જ પડશે. જે વિદ્યાર્થીઓ ભવિષ્યમાં ડૉક્ટર બનીને લોકોના જીવ બચાવી શકતા હતા, તેઓ સિસ્ટમની નિષ્ફળતાને કારણે પોતાનો જીવ ગુમાવી રહ્યા છે," એમ દિપકેએ કહ્યું.
દેશભરમાં શાંતિપૂર્ણ વિરોધની યોજના
દિપકેએ જાહેરાત કરી કે આ અભિયાનનો આગામી તબક્કો ગુરુવારે પુણેમાં યોજાનારા શાંતિપૂર્ણ વિરોધ પ્રદર્શનથી શરૂ થશે. ત્યારબાદ લખનૌ, અમૃતસર, જયપુર અને બેંગલુરુ સહિતના શહેરોમાં પણ સમાન પ્રકારના કાર્યક્રમો યોજવામાં આવશે.
તેમણે કેન્દ્ર સરકારને પરીક્ષા વ્યવસ્થામાં રહેલી ખામીઓ માટે "નૈતિક જવાબદારી" સ્વીકારવાની અપીલ કરી.
20 જૂને દિલ્હીમાં મહા પ્રદર્શનની ચેતવણી
દિપકેએ જણાવ્યું કે જો ધર્મેન્દ્ર પ્રધાન પદ પર યથાવત રહેશે તો 20 જૂને દેશભરના વિદ્યાર્થીઓ અને યુવાનો નવી દિલ્હીમાં એકત્રિત થશે.
તેમણે કહ્યું કે તેઓ પોતે પણ આ વિરોધમાં જોડાશે અને દેશભરના સમર્થકોને આંદોલનમાં ભાગ લેવા અપીલ કરી છે.
"જો ધર્મેન્દ્ર પ્રધાન રાજીનામું નહીં આપે તો દેશભરના વિદ્યાર્થીઓ અને યુવાનો દિલ્હી પહોંચશે અને રાજીનામું મળ્યા વિના પાછા નહીં ફરે," એમ તેમણે જણાવ્યું.
પરીક્ષા વ્યવસ્થાપન પર ઉઠાવ્યા સવાલ
પ્રેસ કોન્ફરન્સ દરમિયાન દિપકેએ મુખ્ય પરીક્ષાઓના સંચાલન અંગે પણ સવાલો ઉઠાવ્યા. તેમણે આરોપ લગાવ્યો કે પ્રશ્નપત્ર લીક થવાની ઘટનાઓ અને ટેક્નિકલ ખામીઓ હવે વારંવાર જોવા મળી રહી છે.
"પેપર લીક થઈ રહ્યા છે, સર્વર ડાઉન થઈ રહ્યા છે અને વિદ્યાર્થીઓને તેનો ભોગ બનવું પડી રહ્યું છે. આ માટે જવાબદારી કોણ લેશે અને આ સ્થિતિ કેટલો સમય ચાલુ રહેશે?" એમ તેમણે પ્રશ્ન કર્યો.
કૉકરોચ જનતા પાર્ટી છેલ્લા કેટલાક સમયથી પરીક્ષાઓમાં પારદર્શિતા અને જવાબદારીની માગ સાથે અભિયાન ચલાવી રહી છે.
