અનંત ચતુર્દશીએ નહીં પણ સંકષ્ટી ચતુર્થીએ થાય છે અંધેરીચા રાજાની મૂર્તિનું વિસર્જન
અંધેરીચા રાજા
ગણેશોત્સવ પૂરો થઈ ગયો છે અને શ્રાદ્ધ પણ શરૂ થઈ ગયાં છે ત્યારે મુંબઈમાં હજી એક ગણેશજીની પ્રતિમાનું વિસર્જન શા માટે નથી થયું એ પ્રશ્ન સહજ ઊભો થાય જ. જોકે અંધેરીચા રાજાની ગણેશમૂર્તિનું વિસર્જન ૨૯ સપ્ટેમ્બરે એટલે કે આવતી કાલે કરવામાં આવશે. સામાન્ય રીતે ગણેશોત્સવમાં સ્થાપિત ગણપતિની મૂર્તિઓનું વિસર્જન અનંત ચતુર્દશી સુધીમાં થઈ જાય છે. જોકે અંધેરીચા રાજા ગણપતિની મૂર્તિનું વિસર્જન દર વર્ષે અનંત ચતુર્દશી પછી આવતી સંકટ ચતુર્થીના દિવસે જ થાય છે. આ વર્ષે સંકટ ચતુર્થી મંગળવારે ૨૯ સપ્ટેમ્બરે આવતી હોવાને કારણે અંગારકી ચતુર્થી પણ કહેવાશે. આ દિવસે અંધેરીચા રાજાની મૂર્તિનું વિસર્જન કરવામાં આવશે.
૧૯૬૬માં શરૂ કરવામાં આવેલું આ ગણપતિ મંડળ એક અલગ જ પ્રકારની પરંપરાને માને છે. તેમના મતે વર્કર્સ અને એક ઇન્ડસ્ટ્રી વચ્ચે થયેલા મતભેદનો ઉકેલ ગણપતિજીએ લાવ્યો હતો. જો ઉકેલ આવે તો દર વર્ષે બાપ્પાની મૂર્તિનું વિસર્જન સંકટ ચોથના દિવસે કરવાની માનતા રાખવામાં આવી હતી. સમસ્યાનો ઉકેલ આવ્યા બાદથી હવે દર વર્ષે સંકષ્ટી ચતુર્થીના દિવસે જ અંધેરીચા રાજાની મૂર્તિનું વિસર્જન કરવામાં આવે છે.
