સાદાં કપડાંમાં BESTના અધિકારીઓ અને ડેપોનો સ્ટાફ તહેનાત
વાઇરલ વિડીયોમાંથી સ્ક્રીનશૉટ
દાદરના પ્લાઝા સિનેમા નજીક ૮ જૂને બૃહન્મુંબઈ ઇલેક્ટ્રિસિટી સપ્લાય ઍન્ડ ટ્રાન્સપોર્ટ (BEST) અન્ડરટેકિંગની બસ દ્વારા થયેલા અકસ્માતમાં બે જણનાં મૃત્યુ થવાની ઘટના બાદ BEST દ્વારા બેદરકારીપૂર્વક બસ ચલાવનારા વેટ-લીઝ એટલે કે કૉન્ટ્રૅક્ટ પરની બસોના ડ્રાઇવરો વિરુદ્ધ પગલાં લેવાનું શરૂ થયું છે. અત્યાર સુધી BEST દ્વારા કાર્યવાહી કરીને બસ ચલાવતી વખતે મોબાઇલનો ઉપયોગ કરનારા ૨૩ બસ-ડ્રાઇવરોને દંડ ફટકારવામાં આવ્યો છે.
૧૨ જૂનથી ૩૦ જૂન દરમ્યાન આ કાર્યવાહી કરવામાં આવી હતી અને નિયમોનું ઉલ્લંઘન કરનારા ડ્રાઇવરોને એક-એક હજાર રૂપિયાનો દંડ પણ ફટકારવામાં આવ્યો હતો. ભવિષ્યમાં ફરીથી આ જ નિયમનું ઉલ્લંઘન કરનારા ડ્રાઇવરોને બમણો દંડ ફટકારવામાં આવશે એમ BESTના અધિકારીઓએ જણાવ્યું હતું.
ADVERTISEMENT
સાદાં કપડાંમાં BESTના અધિકારીઓ રાખે છે બાજનજર
નિયમોનું ઉલ્લંઘન કરીને પ્રવાસીઓના જીવને જોખમમાં મૂકનારા ડ્રાઇવરો પર નજર રાખવા માટે BESTના અધિકારીઓને સાદાં કપડાંમાં તહેનાત કરવામાં આવ્યા છે. પ્રવાસીઓની સુરક્ષા જોખમમાં ન મુકાય એ માટે આ રીતે ફોન પર વાત કરનારા, ઇઅર-ફોન કે હેડફોનનો ઉપયોગ કરનારા, યોગ્ય રીતે ન બેસીને બસ ચલાવનારા ડ્રાઇવરો પર નજર રાખવા માટે BESTના અધિકારીઓ ઉપરાંત બસડેપોના સ્ટાફને પણ સાદાં કપડાંમાં તહેનાત કરવામાં આવ્યો છે.
