૨૦૦૩ પછી સૌથી મોટી ઍરફોર્સ તહેનાત કરી, આ મિલિટરી ઑપરેશન લાંબું ચાલશે એવી સંભાવના
પ્રતીકાત્મક તસવીર
અમેરિકા અને ઈરાન વચ્ચે તનાવ ખૂબ જ ઝડપથી વધી રહ્યો છે. ઇન્ટરનૅશનલ સિક્યૉરિટીના નિષ્ણાતોના કહેવા મુજબ આ જ અઠવાડિયે અમેરિકા ઈરાન પર હુમલો કરી શકે છે. અમેરિકાએ મિલિટરી મૂવમેન્ટ પણ એ રીતે ગોઠવી છે કે એ ગમે ત્યારે ઈરાન પર ધાબો બોલી શકે છે. મિડલ-ઈસ્ટમાં અમેરિકાએ ૨૦૦૩માં ઇરાકમાં જે પાયે ઍરફોર્સ તહેનાત કરેલી લગભગ એવી જ ફોજ ઈરાન માટે સજ્જ થઈ ગઈ છે. અમેરિકાએ F-35, F-22, F-15, F-16 જેવાં ઍડવાન્સ્ડ ફાઇટર જેટ્સની સ્ક્વૉડ્રન તહેનાત કરી છે. મોટા પાયા પર ઍર-ઑપરેશન માટે જરૂરી કમાન્ડ અને કન્ટ્રોલ ઍરક્રાફ્ટ પણ મોકલાઈ રહ્યાં છે.
અમેરિકાની ન્યુઝ-એજન્સીઓના રિપોર્ટ મુજબ જો અમેરિકા સૈન્યની કાર્યવાહી કરશે તો આ અનેક અઠવાડિયાંઓ સુધી ચાલનારું મોટું ઑપરેશન હશે. ટ્રમ્પે વૉશિંગ્ટનમાં ઈરાન વિશે કહ્યું હતું કે ‘હવે સમય આવી ગયો છે કે ઈરાન એ રસ્તા પર આવી જાય જેના પર અમેરિકા કામ કરી રહ્યું છે. જો ઈરાન અમારી સાથે જોડાશે તો સારું થશે, જો નહીં જોડાય તો પણ ઠીક છે. જોકે એ પછી રસ્તો સાવ અલગ હશે.’
