ગોરાઈના ફાર્મહાઉસના સ્વિમિંગ-પૂલમાં યુવક ડૂબી ગયો
મીરા-ભાઈંદર કેમિસ્ટ્સ અસોસિએશનના પ૦ ફૅમિલી-સભ્યો ગઈ કાલે બોરીવલીના ગોરાઈમાં એક પ્રાઇવેટ બંગલામાં પિકનિક મનાવવા ગયા હતા એ વખતે ૩૦ વર્ષનો મારવાડી યુવક સ્વિમિંગ-પૂલમાં ડૂબી જતાં તેનું મોત થયું હતું. ગોરાઈ પોલીસે આ ઘટનામાં અકસ્માતે મોતનો ગુનો નોંધ્યો છે.
ગોરાઈના સિનિયર પોલીસ-ઇન્સ્પેક્ટરે ‘મિડ-ડે’ને કહ્યું હતું કે ‘ગોરાઈના એક બંગલામાં મીરા-ભાઈંદર કેમિસ્ટ્સ અસોસિએશનના સભ્યો પરિવાર સાથે ગઈ કાલે પિકનિક મનાવી રહ્યા હતા ત્યારે બપોરે સવાચાર વાગ્યે ૩૦ વર્ષના કુણાલ લોહિયાનું સ્વિમિંગ-પૂલમાં ડૂબી જવાથી મોત નીપજ્યું હતું. આ ઘટનામાં અમે અકસ્માતે મોતનો કેસ દાખલ કરીને વધુ તપાસ કરી રહ્યા છીએ.’
પોલીસ-સૂત્રોએ જણાવ્યા અનુસાર ગોરાઈમાં એક કૉપોર્રેટરના ફાર્મહાઉસમાં મીરા-ભાઈંદરના કેમિસ્ટ પરિવારના ૫૦ જણ પિકનિક મનાવવા ગયા હતા. મૃત્યુ પામનાર કુણાલ લોહિયા મીરા-ભાઈંદર કેમિસ્ટ્સ અસોસિએશનના પ્રમુખ બાબુલાલ લોહિયાનો દીકરો છે. કુણાલની ડેડ-બૉડી પોસ્ટમૉર્ટમ માટે મોકલવામાં આવી છે.
