BJP ભલે પોતાની પીઠ થાબડે, પણ બન્ને રાજ્યોમાં ઘટ્યો છે એનો વોટ-શૅર

Published: 24th December, 2014 05:17 IST

લોકસભા ઇલેક્શનની સરખામણીએ વિધાનસભાની ચૂંટણીમાં કેસરિયા પાર્ટીને નવ ટકા ઓછા મતો મળ્યા 




ઝારખંડ અને જમ્મુ-કાશ્મીરની ચૂંટણીમાં પોતાના દેખાવ માટે ભારતીય જનતા પાર્ટી (BJP)એ ભલે રાજીપો જાહેર કર્યો હોય અને જીતનું શ્રેય વડા પ્રધાનને આપ્યું હોય, પણ હકીકત એ છે કે કેન્દ્રમાં નરેન્દ્ર મોદી સરકારની રચનાના માત્ર છ મહિનામાં આ બન્ને રાજ્યોમાં યોજાયેલી ચૂંટણીમાં BJPનો વોટ-શૅર ઘટ્યો છે.

આ બન્ને રાજ્યોમાં BJPએ નરેન્દ્ર મોદીના નેતૃત્વમાં ચૂંટણી લડી હતી અને BJPને એમ હતું કે લોકો નરેન્દ્ર મોદીના નામે મત આપશે, પણ જમ્મુ-કાશ્મીરના હિન્દુ બાહુલ્યવાળા વિસ્તારોમાં પણ BJPને લોકસભાની સરખામણીએ વિધાનસભાની આ ચૂંટણીમાં ઓછા મતો મળ્યા છે.

લોકસભાની ચૂંટણીમાં જમ્મુ-કાશ્મીરની કુલ છ બેઠકોમાંથી ત્રણ પર BJPનો વિજય થયો હતો અને કુલ ૩૨ ટકા મતો એને મળ્યા હતા, પણ ગઈ કાલે જાહેર થયેલા વિધાનસભા ચૂંટણીના પરિણામમાં BJPનો વોટ-શૅર ઘટીને ૨૩ ટકા થઈ ગયો છે. જમ્મુ-કાશ્મીરમાં સૌથી વધુ વોટ મેળવનારી પાર્ટી BJP બની છે એવું આશ્વાસન પક્ષના વડા અમિત શાહ લઈ શકે છે.

ઝારખંડમાં છ મહિના પહેલાં લોકસભાની ચૂંટણી વખતે BJP ૫૪ વિધાનસભા ક્ષેત્રોમાં વોટ-શૅરની દૃષ્ટિએ નંબર વન પાર્ટી બની હતી. એને ૪૧ ટકા વોટ મળ્યા હતા અને ૧૪માંથી ૧૨ બેઠકો જીતી હતી. નરેન્દ્ર મોદીએ જોરદાર પ્રચાર કર્યો હોવા છતાં નવ ટકા મતદારો આ વખતે BJPને છોડીને અન્યત્ર ચાલ્યા ગયા છે. આ વખતે વિધાનસભાની ચૂંટણીમાં BJPને ૩૨ ટકા મતો મળ્યા છે. જોકે જમ્મુ-કાશ્મીરની માફક ઝારખંડમાં પણ આગલી વિધાનસભા ચૂંટણીની સરખામણીએ આ વખતે BJPનો વોટ-શૅર વધ્યો છે.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK