ફૅમિલી ટાઇમ વિથ કપિલ શર્મા: કપિલ શર્માનો શો એકાએક બંધ થવાનંં કારણ શું?
ફૅમિલી ટાઇમ વિથ કપિલ શર્મા
કપિલ શર્માના ‘ધ કપિલ શર્મા શો’ની લોકપ્રિયતા આજે એટલી છે કે મોટા ગજાના કલાકારો પણ એમાં મહેમાન બનીને આવે છે. જોકે એક સમયે કપિલ તેના પ્રોફેશનલ અને પર્સનલ વિવાદને કારણે પણ ચર્ચામાં હતો. કપિલનો શો ‘કૉમેડી નાઇટ્સ વિથ કપિલ’ એકાએક બંધ થયો અને ઘણાને ખબર નહીં હોય કે એક લાંબા બ્રેક પછી ૨૦૧૮માં કપિલે ‘ફૅમિલી ટાઇમ વિથ કપિલ શર્મા’ નામના શોથી કમબૅક કર્યું હતું. ‘ફૅમિલી ટાઇમ વિથ કપિલ શર્મા’ મૂળ ગેમ-શો હતો જેમાં હોસ્ટ તરીકે કપિલ અને તાજેતરમાં ‘ભાભીજી ઘર પર હૈ’માં એન્ટર થયેલી અભિનેત્રી નેહા પેંડસે હતી, તો કિકુ શારદા અને ચંદન પ્રભાકર જેવા કૉમેડી કલાકારો પણ શોનો ભાગ બન્યા હતા. આ શોનું દુર્ભાગ્ય એ હતું કે એના ગણીને ફક્ત ત્રણ જ એપિસોડ પ્રસારિત થઈ શક્યા હતા. નાદુરસ્ત તબિયત ઉપરાંત કપિલના પ્રોફેશનલ અને પર્સનલ ઇશ્યુને લીધે આ શો આગળ ન વધી શક્યો. એક એપિસોડમાં રાની મુખરજી ગેસ્ટ તરીકે આવવાની હતી, પણ કપિલે શોનું શૂટિંગ જ કૅન્સલ કરી નાખ્યું હતું. મેકર્સ પાસે એપિસોડ બૅન્ક ન હોવાથી પહેલાં તો શો એક મહિના સુધી હોલ્ડ પર મૂકવામાં આવ્યો, પણ પછી સાવ બંધ જ થઈ ગયો.