બોની કપૂરના ઘરમાં કામ કરનાર માણસ નીકળ્યો કોરોના પૉઝિટિવ
બોની કપૂરના ઘરમાં કામ કરનારો કર્મચારી ઘણા દિવસથી બીમાર હતો અને તે હવે કોરોના પૉઝિટિવ નીકળ્યો છે. બીએમસીએ તેને ક્વૉરન્ટીન સેન્ટરમાં લઈ જવા માટે પ્રોસેસ શરૂ કરી દીધી છે. આ વિશે બોની કપૂરે કહ્યું હતું કે ‘હું, મારાં બાળકો અને મારા ઘરનો અન્ય સ્ટાફ એકદમ સારા છીએ અને કોઈને કોરોનાનાં લક્ષ્ણ નથી દેખાઈ રહ્યાં. લૉકડાઉન શરૂ થયું ત્યારથી અમે અમારા ઘરમાંથી બહાર પણ નથી નીકળ્યાં. અમે મહારાષ્ટ્ર સરકાર અને બીએમસીના આભારી છીએ કે તેમણે તરત જ આ અંગે કાર્યવાહી હાથ ધરી. અમને બીએમસી દ્વારા જે ગાઇડલાઇન આપવામાં આવી છે એને અમે ફૉલો કરીશું. અમને આશા છે કે ચરણ ખૂબ જ જલદી સાજો થઈને ફરી અમારા ઘરે આવશે.’
લોખંડવાલા કૉમ્પ્લેક્સમાં આવેલા ગ્રીન એકર્સ ઘરમાં 23 વર્ષનો ચરણ સાહુ ડોમેસ્ટિક હેલ્પર તરીકે કામ કરે છે. શનિવારની સાંજથી તે બીમાર હતો અને એથી જ બોની કપૂરે તેને ટેસ્ટ માટે મોકલ્યો હતો અને ત્યાર બાદ આઇસોલેશનમાં રાખ્યો હતો. ટેસ્ટમાં પૉઝિટિવ આવતાં બીએમસીએ સોસાયટીને જાણ કરી હતી.