બંગાળી ફૂડ અને કલકત્તાનું કલ્ચર ખૂબ પસંદ છે આહના કુમરાને
આહના કુમરા
બંગાળી ફૂડ અને કલકત્તાનું કલ્ચર આહના કુમરાને ખૂબ પસંદ છે અને એને તે ખૂબ મિસ કરી રહી છે. કલકત્તા વિશે આહનાએ કહ્યું હતું કે ‘મેં કલકત્તામાં ખૂબ સમય પસાર કર્યો છે. હું સતત બંગાળીઓથી ઘેરાયેલી રહેતી હતી. મારો દેવર બંગાળી છે. ટીવી સિરીઝ ‘યુદ્ધ’નો મારો પહેલો ડિરેક્ટર રીભુ દાસગુપ્તા બંગાળી છે. હું થિયેટરમાં પહેલેથી કામ કરતી આવી છું, એથી રબિન્દ્ર સદનમાં પર્ફોર્મન્સિસ માટે જતી હતી. બંગાળી ભોજન, સંસ્કૃતિ એ બધાથી હું એટલી તો ટેવાઈ ગઈ છું કે મને ઘર જેવું જ લાગે છે.’
આહનાએ ‘રૂલ્સ ઑફ ધ ગેમ્સ’માં કામ કર્યું છે જે Zee5 પર ચાલી રહી છે. બંગાળી ફૂડ પ્રતિ જે પ્રેમ છે એ વિશે આહનાએ કહ્યું હતું કે ‘વાત જ્યારે મારા ફ્રેન્ડ અને કલીગ ટૉની દાની આવે છે તો હું એટલું જરૂર કહીશ કે તેમણે જ અમને બગાડ્યા છે. હવે અમારે સેટ પર પાછા જવું છે. ફિલ્મ માટે થયેલી પહેલી મીટિંગ વખતે તેમણે અમને ઘરે બોલાવ્યા હતા. તેમણે અમને સ્વાદિષ્ટ બંગાળી ભોજન પીરસ્યું હતું. આવું ભોજન ખાવા માટે તો હું તેમની સાથે અન્ય ફિલ્મ કરવા માગું છું. ફિલ્મ પત્યા બાદ પ્રસૂન અમારા કાસ્ટિંગ ડિરેક્ટર જે બંગાળી છે, તેમણે પણ અમને તેમના ઘરે જમવા બોલાવ્યા હતા. એ વખતે અમને ફરીથી સ્વાદિષ્ટ ભોજન ખાવા મળ્યું હતું. બંગાળી ફૂડમાં કંઈક તો જાદુ છે. એનો મસાલો, એની તાજગી એ બધાથી એ ફૂડ માટેની લાલચ વધતી જાય છે.’