સિરીઝ ડ્રૉ કરાવવામાં સફળ રહ્યો હાફિઝ
મોહંમદ હાફીઝ
પાકિસ્તાની બૅટ્સમૅન મોહમ્મદ હાફિઝે નૉટ-આઉટ ૮૬ રન કરીને પાકિસ્તાનને સિરીઝ ડ્રૉ કરાવવામાં સફળતા અપાવી હતી. ઇંગ્લૅન્ડ સામેની ટેસ્ટ-સિરીઝ હાર્યા બાદ તેમણે ત્રણ ટી20 મૅચની સિરીઝ રમી હતી. પહેલી મૅચ વરસાદને કારણે ધોવાઈ ગઈ હતી અને બીજી મૅચ ઇંગ્લૅન્ડ જીત્યું હતું. જોકે છેલ્લી મૅચ પાકિસ્તાને જીતીને સિરીઝ ડ્રૉ કરી છે. ૨૦ ઓવરમાં પાકિસ્તાને ૧૯૦ રન કર્યા હતા. ત્રીજી વિકેટ માટે હાફિઝ (૮૬) અને ડેબ્યુટન્ટ હૈદર અલીએ (૫૪) ૧૦૦ રનની પાર્ટનરશિપ કરી હતી. મોઇન અલીના ૬૧ રન છતાં ઇંગ્લૅન્ડ ૨૦ ઓવરમાં ૧૮૫ રન કરી શકી હતી. પાકિસ્તાન ફક્ત પાંચ રનથી જીત્યું હતું. હૈદર અલી પાકિસ્તાનનો પહેલો પ્લેયર બન્યો છે જેણે તેની ટી20 ડેબ્યુ મૅચમાં ફિફ્ટી મારી હોય અને એ પણ ફક્ત ૨૮ બૉલમાં. ઇંગ્લૅન્ડ હવે શુક્રવારથી ઑસ્ટ્રેલિયા સાથે ત્રણ મૅચની ટી20 સિરીઝ રમશે.
