એક વેન્યુ પર હાઇએસ્ટ T20 સિક્સર ફટકારવાનો ક્રિસ ગેઇલનો રેકૉર્ડ તોડ્યો કિંગ કોહલીએ

કોહલીએ ચેન્નઈ સામે ૩૪ ઇનિંગ્સમાં ૧૧૪૬ રન ફટકારીને એક હરીફ ટીમ સામે હાઇએસ્ટ રન કરવાનો ડેવિડ વૉર્નરનો રેકૉર્ડ તોડ્યો હતો

વિરાટ કોહલી

શનિવારે રૉયલ ચૅલેન્જર્સ બેન્ગલુરુના સ્ટાર બૅટર વિરાટ કોહલીએ ૧૮૭.૮૮ના સ્ટ્રાઇક-રેટથી ૩૩ બૉલમાં ૬૨ રન ફટકારીને IPLમાં હાઇએસ્ટ ૮૫૦૦ રન પૂરા કર્યા હતા. એ ઇનિંગ્સમાં પાંચ ચોગ્ગા અને પાંચ છગ્ગા ફટકારનાર કોહલી ચેન્નઈ સુપર કિંગ્સ સામે હાઇએસ્ટ ૧૦ ફિફ્ટી પ્લસ સ્કોર કરનાર પહેલો બૅટર બન્યો હતો. તેણે નવ વખતનો રેકૉર્ડ ધરાવતા શિખર ધવન, રોહિત શર્મા અને ડેવિડ વૉર્નરને આ મામલે પાછળ છોડ્યા હતા.

કોહલીએ ચેન્નઈ સામે ૩૪ ઇનિંગ્સમાં ૧૧૪૬ રન ફટકારીને એક હરીફ ટીમ સામે હાઇએસ્ટ રન કરવાનો ડેવિડ વૉર્નરનો રેકૉર્ડ તોડ્યો હતો. વૉર્નરે પંજાબ કિંગ્સ સામે ૨૬ ઇનિંગ્સમાં ૧૧૩૪ રન બનાવ્યા હતા. વિરાટ કોહલી સૌથી વધુ આઠ વાર એક IPL સીઝનમાં ૫૦૦ પ્લસનો સ્કોર કરનાર બૅટર પણ બન્યો હતો. આ મામલે પણ તેણે ડેવિડ વૉર્નર (સાત વખત)ને પછાડ્યો હતો.

ADVERTISEMENT

કોહલીએ બૅન્ગલોર ટીમના પોતાના જૂના સાથી ક્રિસ ગેઇલનો એક વેન્યુ પર હાઇએસ્ટ T20 સિક્સર ફટકારવાનો રેકૉર્ડ પણ તોડ્યો હતો. ગેઇલે એમ. ચિન્નાસ્વામી સ્ટેડિયમમાં ૧૫૧ T20 સિક્સર ફટકાર્યા હતા. વિરાટે આ જ મેદાન પર ૧૫૪ સિક્સર ફટકારીને એક ટીમ માટે હાઇએસ્ટ ૩૦૦ T20 સિક્સર ફટકારવાની સિદ્ધિ પણ મેળવી હતી.