પોલીસે આ કેસમાં વેસ્ટ ઇન્ડીઝથી બે શંકાસ્પદ લોકોની ધરપકડ કરી છે
રિન્કુ સિંહ
ભારતના સ્ટાર ક્રિકેટર રિન્કુ સિંહને અન્ડરવર્લ્ડ તરફથી ધમકીઓ મળી હોવાના અહેવાલ મળ્યા છે. મુંબઈ ક્રાઇમ બ્રાન્ચની તપાસમાં જાણવા મળ્યું હતું કે ડી-કંપની તરીકે ઓળખાતી કુખ્યાત દાઉદ ઇબ્રાહિમ ગૅન્ગે ફેબ્રુઆરી અને એપ્રિલ ૨૦૨૫ વચ્ચે ૩ વખત રિન્કુ સિંહની પ્રમોશનલ ટીમને પાંચ કરોડ રૂપિયાની ખંડણીની ધમકી મોકલી હતી.
ઉત્તર પ્રદેશના અલીગઢના એક સામાન્ય પરિવારમાંથી આવેલા રિન્કુએ પોતાની શાનદાર ક્રિકેટ કરીઅરથી લોકપ્રિયતા મેળવી છે. હાલમાં જ સંસદસભ્ય પ્રિયા સરોજ સાથે સગાઈ કરનાર રિન્કુને હવે તેની વધતી જતી ખ્યાતિ સાથે સુરક્ષા-ચિંતાઓનો સામનો કરવો પડી રહ્યો છે. પોલીસે આ કેસમાં વેસ્ટ ઇન્ડીઝથી બે શંકાસ્પદ લોકોની ધરપકડ કરી છે. અહેવાલ અનુસાર આ આરોપીઓની અગાઉ દિવંગત વિધાનસભ્ય બાબા સિદ્દીકીના દીકરા ઝીશાન સિદ્દીકી પાસે ૧૦ કરોડ રૂપિયાની ખંડણી માગવા બદલ ધરપકડ કરવામાં આવી હતી.
