ડેવિડ વૉર્નરની પત્નીએ કૅપ્ટન બનવા પરનો પતિ પરનો પ્રતિબંધ તાબડતોબ ઉઠાવવા ઑસ્ટ્રેલિયન બોર્ડ પાસે કરી માગણી
ઑસ્ટ્રેલિયાના ટોચના બૅટર ડેવિડ વૉર્નરની પત્ની કૅન્ડીસે ચાર વર્ષ જૂના બૉલ-ટૅમ્પરિંગ કાંડ બદલ પોતાના પતિ પર લાગુ કરાયેલા પ્રતિબંધનો મુદ્દો સોમવારે ઉખેડ્યો
ઑસ્ટ્રેલિયાના ટોચના બૅટર ડેવિડ વૉર્નરની પત્ની કૅન્ડીસે ચાર વર્ષ જૂના બૉલ-ટૅમ્પરિંગ કાંડ બદલ પોતાના પતિ પર લાગુ કરાયેલા પ્રતિબંધનો મુદ્દો સોમવારે ઉખેડ્યો હતો અને એ તાત્કાલિક પાછો ખેંચવાની ક્રિકેટ બોર્ડને અપીલ કરી હતી. કૅપ્ટન્સી મેળવવા સામે વૉર્નર પર બૅન મુકાયો છે અને કૅન્ડીસે બોર્ડને કહ્યું છે કે ‘મારો પતિ માત્ર લીગ ટુર્નામેન્ટમાં રમતો થઈ જાય તો પછી કહેતા નહીં. તેને કૅનેડા અને વેસ્ટ ઇન્ડીઝ સહિત વિશ્વભરની ઘણી ટી૨૦ ટુર્નામેન્ટમાં રમવાની ઑફર મળી છે. યુએઈમાં પણ લીગ આવી રહી છે અને એમાં ઘણા પૈસા અને કૅપ્ટન્સી ઑફર થઈ રહ્યાં છે.’
કૅન્ડીસે ઇંગ્લૅન્ડના એક રેડિયો નેટવર્કને આપેલી મુલાકાતમાં ભારતનો તેમ જ આઇપીએલનો ઉલ્લેખ કરતાં કહ્યું કે ‘ભારતમાં અને ઑસ્ટ્રેલિયામાં ડેવિડનો બહુ સારો ટી૨૦ રેકૉર્ડ છે. તે આપણા બેસ્ટ એવર ક્રિકેટરોમાંનો એક છે. તેણે તાજેતરમાં ઑસ્ટ્રેલિયાને પહેલો ટી૨૦ વર્લ્ડ કપ અપાવવામાં મોટું યોગદાન આપ્યું હતું. તેના પરનો કૅપ્ટન્સી સંભાળવાનો પ્રતિબંધ ઉઠાવાશે કે નહીં ઉઠાવાય, તે બિગ બૅશમાં રમવાનું નક્કી કરી લે તો નવાઈ નહીં. અમારા પરિવાર માટે જે બેસ્ટ હશે એ તે કરીને રહેશે. મારાથી અન્યાય ક્યારેય સહન નથી થતો અને એટલે જ હું ડેવિડના કિસ્સામાં આ બધું કહી રહી છું. તે બીજા દેશની લીગમાં જઈને કૅપ્ટન્સી સંભાળી શકે, ભારતમાં આઇપીએલમાં પણ તેને નેતૃત્વ સંભાળવા મળે તો ઑસ્ટ્રેલિયાની ટીમમાં કેમ નહીં? ડેવિડના ક્રિકેટને લગતી સમજબૂઝની ભારતમાં જે કદર થાય છે અને ટીમ માટે ડેવિડ શું શું કરી શકે છે એની જો કિંમત થતી હોય તો એના પરથી શીખવા જેવું છે.’ વૉર્નર દંપતીને ભારત ખૂબ પ્રિય છે. તેમને ત્રણ પુત્રી છે જેમાં બીજા નંબરની દીકરીનું નામ ઇન્ડિ રેઇ રાખ્યું છે.