આયુષ પ્રતિભાશાળી છે. તેની પાસે ઉત્તમ સંકલન છે. તે આક્રમક છે. આધુનિક સમયના T20 ક્રિકેટરમાં આપણને જે ગમે એ બધું જ છે - ચેન્નઈનો હેડ કોચ સ્ટીફન ફ્લેમિંગ
આયુષ મ્હાત્રે
મુંબઈના યંગ બૅટર આયુષ મ્હાત્રેએ શનિવારે ચેન્નઈ સુપર કિંગ્સ માટે રૉયલ ચૅલેન્જર્સ બેન્ગલુરુ સામે શાનદાર ઇનિંગ્સ રમી હતી. પોતાની ચોથી IPL મૅચમાં તેણે ૧૯૫.૮૩ના સ્ટ્રાઇક-રેટથી બૅટિંગ કરતાં નવ ચોગ્ગા અને પાંચ છગ્ગાની મદદથી ૪૮ બૉલમાં ૯૪ રન ફટકારીને ૨૧૪ રનના ટાર્ગેટ-ચેઝને સરળ બનાવ્યો હતો. ૬ રનથી સેન્ચુરી ચૂકનાર આ પ્લેયરે ચેન્નઈના ભૂતપૂર્વ ક્રિકેટર સુરેશ રૈનાનો ૧૭ વર્ષ જૂનો રેકૉર્ડ તોડ્યો હતો.
૧૭ વર્ષ ૨૯૧ દિવસની ઉંમરે IPLમાં ફિફ્ટી ફટકારનાર આયુષ ચેન્નઈનો યંગેસ્ટ પ્લેયર બન્યો છે. આ પહેલાં ૨૦૦૮માં સુરેશ રૈનાએ ૨૧ વર્ષ ૧૪૮ દિવસની ઉંમરે મુંબઈ ઇન્ડિયન્સ સામે ફિફ્ટી ફટકારીને આ રેકૉર્ડ બનાવ્યો હતો. મુંબઈ માટે ડોમેસ્ટિક ક્રિકેટ રમતા આયુષે વાનખેડે સ્ટેડિયમમાં મુંબઈ ઇન્ડિયન્સ સામે IPL ડેબ્યુ કરીને ચેન્નઈનો યંગેસ્ટ પ્લેયર બનવાની સિદ્ધિ પણ મેળવી હતી.
