૧ વર્ષ, ૧૧ મહિના અને ૧ દિવસ બાદ રિયાન પરાગે ફિફ્ટી ફટકારી

૩ દિવસ પેઇનકિલર લઈને પથારીવશ હતો : સૌથી નાની વયે ૧૦૦ T20 મૅચ રમનારો ભારતીય બન્યો

રિયાન પરાગ

જયપુરના સવાઈ માનસિંહ સ્ટેડિયમમાં ઇન્ડિયન પ્રીમિયર લીગ (IPL)ની ૧૭મી સીઝનની નવમી મૅચમાં રાજસ્થાન રૉયલ્સ (RR)એ દિલ્હી કૅપિટલ્સ (DC)ને ૧૨ રનથી હરાવ્યું હતું. આ સાથે જ સતત નવમી મૅચમાં હોમ ટીમે જીત મેળવી હતી. પ્રથમ બૅટિંગ કરતાં RRએ પાંચ વિકેટ ગુમાવીને ૧૮૫ રન બનાવ્યા હતા, જેની સામે DCની ટીમ એટલી જ વિકેટના નુકસાન સાથે ૧૭૩ રન બનાવી શકી હતી.

કૅપ્ટન સંજુ સૅમસને રિયાન પરાગને ચોથા ક્રમે બૅટિંગ માટે મોકલ્યો હતો. નવી ભૂમિકામાં આવતાંની સાથે જ રિયાન પરાગ IPL કરીઅરની શ્રેષ્ઠ ઇનિંગ્સ રમ્યો હતો. ૬ સિક્સર અને ૭ ચોગ્ગાની મદદથી ૮૪ રન ફટકારી તેણે સૌને ચોંકાવી દીધા હતા. એન્રિક નોર્ખિયાની અંતિમ ઓવરમાં ૩ ચોગ્ગા અને બે સિક્સરની મદદથી તેણે ૨૫ રન ફટકારી ધમાલ મચાવી હતી. ૨૦૨૨માં બૅન્ગલોર સામે ફટકારેલી ફિફ્ટીના ૭૦૧ દિવસ બાદ રિયાન પરાગે IPLમાં ફિફ્ટી ફટકારી હતી. IPL કરીઅરની તેની આ ત્રીજી ફિફ્ટી છે.

ADVERTISEMENT

બાવીસ વર્ષ ૧૩૯ દિવસની ઉંમરે ૧૦૦મી T20 મૅચ રમનાર તે સૌથી યુવા ભારતીય બન્યો છે. આ પહેલા સંજુ સૅમસન બાવીસ વર્ષ ૧૫૭ દિવસની ઉંમરે ૧૦૦મી T20 મૅચ રમનાર સૌથી યુવા ભારતીય હતો. છેલ્લાં ૩-૪ વર્ષથી સંઘર્ષ કરી રહેલો રિયાન પરાગ છેલ્લા ૩ દિવસથી બીમાર હોવાથી બેડ પર હતો. પેઇનકિલર લઈને તેણે પોતાની જાતને સ્વસ્થ કરી હતી. DC સામે તોફાની ઇનિંગ્સ રમીને તે મૅન ઑફ ધ મૅચ અવૉર્ડ પણ જીત્યો હતો.