ભારતીય પેસ બોલર જયપુરની મૅચમાં ફીલ્ડિંગ દરમ્યાન ફિયાન્સ જયાને શોધી રહ્યો હતો!
દિપક ચહર
ભારતીય પેસ બોલર અને ચેન્નઈ સુપર કિંગ્સના દીપક ચાહરે તાજેતરમાં દુબઈમાં આઇપીએલની એક મૅચ દરમ્યાન એક સ્ટૅન્ડમાં જઈને ફિયાન્સે જયા ભારદ્વાજને પ્રપોઝ કર્યું ત્યારથી ચાહર-ફૅમિલી ક્રિકેટપ્રેમીઓમાં જાણીતું થઈ ગયું છે. બુધવારે ફરી એક વાર જયપુરની મૅચ દરમ્યાન ચાહર પરિવાર ચર્ચામાં હતો.
બન્યું એવું કે ન્યુ ઝીલૅન્ડ સામેની મૅચ દરમ્યાન દીપક ચાહર બાઉન્ડરી લાઇનની નજીક ફીલ્ડિંગ ભરી રહ્યો હતો ત્યારે તેની બહેન માલતી ચાહર તેનો વિડિયો ઉતારી રહી હતી. માલતીએ એક ક્ષણે ‘દીપક’ બૂમ પણ પાડી હતી. દીપકે તેની સામે જોયું અને કંઈક વાત કરવા બાઉન્ડરીલાઇનની નજીક આવ્યો અને થોડી વાર પછી માલતીને પૂછ્યું, ‘કિધર હૈ વો?’ માલતીએ ઇશારાથી કહ્યું, ‘તેરી વો ઉપર બૈઠી હૈ.’
ADVERTISEMENT
દીપક જાણવા માગતો હતો કે તેની ફિયાન્સે જયા દેખાતી નથી તો તે ક્યાં બેસીને મૅચ જુએ છે. માલતીએ તેને કહ્યું કે જયા ઉપરના સ્ટૅન્ડમાં બેઠી છે. ખરેખર તો દીપક માટે બુધવારનો દિવસ બહુ સંઘર્ષપૂર્ણ હતો. તેણે ઓપનર માર્ટિન ગપ્ટિલની વિકેટ તો લીધી હતી, પરંતુ ગપ્ટિલ ૭૦ રન બનાવીને આઉટ થયો હતો. દીપકની ૪ ઓવરમાં ૪૨ રન બન્યા હતા અને તે ટીમનો સૌથી ખર્ચાળ બોલર બન્યો હતો. દીપક તાજેતરના ટી૨૦ વર્લ્ડ કપની સ્કવૉડમાં હતો, પણ તેને રમવા નહોતું મળ્યું.