ગનીમત એ રહી કે અહીં ઉછેરવામાં આવતા મોટા ભાગના સાપ બિનઝેરી હતા અને બહુ ગણ્યાગાંઠ્યા કોબ્રા જેવા ઝેરી સાપો હતા
ઇમર્જન્સી ટીમોએ સ્થાનિક સર્પમિત્રોની સહાય લઈને પાણીમાં વહેતા સાપોને પકડવાનું કામ શરૂ કર્યું હતું
દક્ષિણ ચીનમાં આવેલા ભયાનક વાવાઝોડાને કારણે ભયંકર પૂર જેવી સ્થિતિ પેદા થઈ છે. પૂરને કારણે હેન્ગઝોઉ શહેરમાં એક સ્નેક-બ્રીડિંગ ફાર્મ પણ તળાવમાં તબદીલ થઈ ગયું અને પાણીના ધસમસતા પ્રવાહમાં અંદર રાખેલા સેંકડો સાપ પાણી ભેગા વહી ગયા. પાણીના પ્રવાહ સાથે લગભગ ૯૦૦થી વધુ સાપ બ્રીડિંગ ફાર્મમાંથી ભાગી ગયા હતા. ગનીમત એ રહી કે અહીં ઉછેરવામાં આવતા મોટા ભાગના સાપ બિનઝેરી હતા અને બહુ ગણ્યાગાંઠ્યા કોબ્રા જેવા ઝેરી સાપો હતા. એ થોડાક કોબ્રા સાપને પકડીને સુરક્ષિત સ્થાને પાછા લાવવા માટે સ્થાનિક રેસ્ક્યુ દળોએ સર્ચ ઑપરેશન ગતિમાન કરી દીધું હતું. ઇમર્જન્સી ટીમોએ સ્થાનિક સર્પમિત્રોની સહાય લઈને પાણીમાં વહેતા સાપોને પકડવાનું કામ શરૂ કર્યું હતું. જોકે એ પછી પણ જ્યાં-જ્યાંથી આ પૂરનાં પાણી ફરી વળેલાં એ જગ્યાએ ચોમેર સાપોનું સામ્રાજ્ય જોવા મળ્યું હતું.
