મહિલાનો ભરોસો મેળવવા ડીપફેક દ્વારા મસ્ક જેવો અવતાર ધારણ કરીને વિડિયો-કૉલ કર્યો હતો.
ઇલૉન મસ્ક
અમેરિકાના ઉદ્યોગપતિ ઇલૉન મસ્કની પૉપ્યુલરિટી હૉલીવુડના સ્ટાર્સ કરતાં પણ વધારે છે. જોકે સાઉથ કોરિયામાં એક મહિલાને મસ્ક સાથેની ઑનલાઇન દોસ્તી ૪૨ લાખ રૂપિયામાં પડી હતી. કોરિયન પોલીસે ઓળખ છુપાવવા માટે મહિલાને જૉન્ગ જી સન નામ આપ્યું હતું. ઇન્સ્ટાગ્રામ પર એક દિવસ પોતાને ઇલૉન મસ્ક ગણાવતી વ્યક્તિએ આ મહિલાનો અપ્રોચ કર્યો હતો. વાતવાતમાં મસ્કે પોતાની ઑફિસના ફોટો શૅર કર્યા હતા. મસ્કે એમ કહ્યું કે હું ઘણી વાર રેન્ડમલી મારા ફૅન્સનો સંપર્ક કરું છું. કોરિયન મહિલા એ વખતે જાણે સપનું સાકાર થયું હોય એવો અનુભવ કરી રહી હતી. ઇન્સ્ટાગ્રામ ચૅટમાં મસ્કે પોતાના જીવન વિશે ઘણી વાતો કરી અને એક દિવસ વિડિયો-કૉલ પણ કર્યો હતો. બાદમાં તેણે કોરિયન મહિલાને પૈસાદાર બનવા માટે ઇન્વેસ્ટમેન્ટ કરવા મનાવી અને એક ખાતામાં ૪૦ હજાર પાઉન્ડ (આશરે ૪૨ લાખ રૂપિયા) જમા કરવાનું કહ્યું. પૈસા જમા કર્યા બાદ મહિલાને ભાન થયું કે તેની સાથે ફ્રૉડ થયો છે. ફ્રૉડ કરનારે પોતે મસ્ક હોવાનો દાવો કરીને મહિલાને ફસાવી હતી. તેણે મહિલાનો ભરોસો મેળવવા ડીપફેક દ્વારા મસ્ક જેવો અવતાર ધારણ કરીને વિડિયો-કૉલ કર્યો હતો.